بھٹکل، 28 اگست (ایس او نیوز): کرناٹک میں ووٹر فہرستوں کی خصوصی گہری نظرثانی (Special Intensive Revision—SIR) کے اگلے مرحلے کے تحت الیکشن کمیشن کی جانب سے کل یعنی 29 اگست اور اگلے دن 30 اگست کو ریاست بھر میں خصوصی مہم چلائی جائے گی۔ اس دوران شہری اپنے متعلقہ پولنگ بوتھ پر پہنچ کر ووٹر فہرست میں نام کی موجودگی کی تصدیق، نام شامل کرنے، تفصیلات میں ترمیم اور اعتراضات سے متعلق درخواستیں جمع کرا سکیں گے۔
یاد رہے کہ الیکشن کمیشن کی SIR کارروائی کے تحت 24 اگست کو کرناٹک کی مسودہ ووٹر فہرست جاری کی گئی ہے، جس میں تقریباً 4.46 کروڑ ووٹرز شامل ہیں، جبکہ SIR سے قبل ریاست میں تقریباً 5.54 کروڑ ووٹر درج تھے۔ بتایا جا رہا ہے کہ مختلف وجوہات، جن میں غیر موجودگی، مستقل منتقلی، موت، ڈپلیکیٹ اندراج اور دیگر معاملات شامل ہیں، کی بنیاد پر تقریباً 1.08 کروڑ نام مسودہ فہرست سے خارج کیے گئے ہیں۔
ذرائع کے مطابق تقریباً 43.8 لاکھ ووٹرز کو نوٹس جاری کیے جا رہے ہیں، جن میں ووٹر فہرست میں ’’Logical Discrepancy‘‘ یا 2002 کی سابقہ ووٹر فہرست سے میپنگ نہ ہونے جیسے معاملات کی نشاندہی کی گئی ہے۔ ان ووٹرز کو اپنی تفصیلات درست کرانے یا نام فہرست میں برقرار رکھنے کے لیے متعلقہ انتخابی حکام کے سامنے دعویٰ یا اعتراض داخل کرنے کا موقع دیا گیا ہے۔
الیکشن حکام نے شہریوں سے اپیل کی ہے کہ وہ خصوصی کیمپوں سے فائدہ اٹھاتے ہوئے اپنے نام اور دیگر انتخابی تفصیلات کی جانچ کریں۔ جن افراد کا نام مسودہ فہرست میں موجود نہیں ہے یا جنہیں کسی قسم کا نوٹس موصول ہوا ہے، وہ مقررہ مدت کے اندر دعویٰ یا اعتراض داخل کریں۔
میڈیا رپورٹس کے مطابق مسودہ فہرست کے خلاف دعویٰ اور اعتراضات داخل کرنے کی آخری تاریخ 23 ستمبر مقرر کی گئی ہے، جبکہ موصولہ دعوؤں اور اعتراضات کو نمٹانے کا عمل 22 اکتوبر تک جاری رہے گا۔ الیکشن کمیشن کی جانب سے SIR کے تحت اسی طرح کی اگلی خصوصی مہم 19 اور 20 ستمبر 2026 کو بھی چلائی جائے گی۔
الیکشن کمیشن کی یہ خصوصی مہم ایسے وقت میں ہو رہی ہے جب SIR کے دوران بڑی تعداد میں نام مسودہ فہرست سے خارج کیے جانے کے باعث سیاسی جماعتوں اور شہری تنظیموں کی جانب سے ووٹرز کو اپنے نام اور انتخابی تفصیلات کی بروقت جانچ کرنے کی اپیل کی جا رہی ہے۔
