ریاض، 25/ مارچ (ایس او نیوز /ایجنسی)سعودی محکمہ شہری دفاع نے مملکت کے کئی علاقوں میں شدید بارش کی پیشگوئی کرتے ہوئے 28 مارچ تک الرٹ جاری کر دیا ہے۔

ایس پی اے کے مطابق محکمہ شہری دفاع نے بیان میں شہریوں کو احتیاطی تدابیر اختیار کرنے کا مشورہ دیا اور کہا کہ خود کو محفوظ مقامات تک محدود رکھیں‘۔

’سیلاب سے متاثرہ مقامات، وادیوں اور نشیبی مقامات سے دور رہیں۔ایسے مقامات پر جہاں بارش کا پانی جمع ہو تیراکی سے گریز کیا جائے‘۔

شہری دفاع کا کہنا ہے ’موسمی تبدیلی کے حوالے سے تازہ ترین معلومات کےلیے سرکاری چینلز اور سوشل میڈیا پلیٹ فارمز پر نظر رکھی جائے‘۔

بیان میں کہا گیا کہ ’مکہ ریجن میں درمیانے درجے سے شدید بارش متوقع ہے جس سے سیلابی صورتحال پیدا ہوسکتی ہے۔ اسی طرح کی صورتحال باحہ، عسیر اور جازان ریجن میں بھی متوقع ہے۔‘

جبکہ نجران ریجن میں درمیانے درجے جبکہ مدینہ ریجن میں ہلکی بارش کا امکان ہے۔