بنگلورو، 27/ جون (ایس او نیوز /ایجنسی) وزیر اعلیٰ ڈی کے شیوکمار نے جمعہ کے روز ودھان سودھا میں محکمۂ کمرشیل ٹیکس (تجارتی محصولات) اور محکمۂ آبکاری کی الگ الگ جائزہ میٹنگوں کی صدارت کرتے ہوئے افسران کو واضح ہدایات دیں کہ ریاست میں ٹیکس وصولی کے اہداف سے بڑھ کر کارکردگی کا مظاہرہ کیا جائے، ٹیکس چوری کو ہر صورت روکا جائے اور ایماندار ٹیکس دہندگان کو کسی قسم کی غیر ضروری پریشانی نہ ہو۔

انہوں نے کہا کہ محکمۂ کمرشیل ٹیکس حکومت کی مالیاتی بنیاد ہے اور افسران کی مؤثر کارکردگی ہی ریاست کی ترقی میں اہم کردار ادا کرتی ہے۔ وزیر اعلیٰ نے اعتماد ظاہر کیا کہ محکمہ موجودہ مالی سال میں مقررہ ہدف سے زیادہ ٹیکس وصول کرے گا۔

انہوں نے سختی سے ہدایت دی کہ کوئی بھی مال بردار گاڑی مکمل دستاویزات اور قانونی حسابات کے بغیر چیک پوسٹ یا ریاستی سرحد عبور نہ کرے۔ ٹیکس چوری یا محصولات کی چوری کے لیے کسی بھی قسم کی نرمی یا غفلت برداشت نہیں کی جائے گی۔

وزیر اعلیٰ نے کہا کہ حکومت جدید ٹیکنالوجی اور ڈیٹا اینالیٹکس کے ذریعے تقریباً 12 لاکھ ٹیکس دہندگان کے ڈیٹا کا 360 ڈگری تجزیہ کرنے کی صلاحیت رکھتی ہے، جس سے نہ صرف مقررہ اہداف حاصل کیے جا سکتے ہیں بلکہ ان سے بھی بہتر نتائج ممکن ہیں۔

انہوں نے واضح کیا کہ حکومت کا مقصد ایماندار ٹیکس دہندگان کو ہراساں کرنا نہیں بلکہ ان کے ساتھ عزت و احترام سے پیش آنا ہے۔ ساتھ ہی افسران کو خبردار کیا کہ اگر کسی سطح پر بدعنوانی یا بے ایمانی ثابت ہوئی تو بلا امتیاز سخت کارروائی کی جائے گی۔

وزیر اعلیٰ نے کہا کہ ریاست میں جی ایس ٹی وصولی میں 9 فیصد اضافہ ہوا ہے، جو قومی اوسط سے بہتر ہے۔ انہوں نے بتایا کہ کرناٹک نے جی ایس ٹی وصولی میں گجرات، تمل ناڈو اور ہریانہ جیسے کئی ریاستوں سے بہتر کارکردگی کا مظاہرہ کیا ہے، تاہم ریاست کو ملک میں پہلے نمبر پر لانے کے لیے مزید مؤثر اقدامات کیے جائیں۔

انہوں نے بتایا کہ آئی آئی ٹی حیدرآباد کے تعاون سے تیار کردہ GST Analytical Portal کے ذریعے جعلی بل، فرضی ان پٹ ٹیکس کریڈٹ (ITC) اور بوگس کمپنیوں کے خلاف سخت نگرانی کی جا رہی ہے۔ اس مہم کے دوران اب تک 166 کروڑ روپے کی وصولی کی جا چکی ہے اور فرضی کمپنیاں قائم کرنے والوں کے خلاف قانونی کارروائی مزید تیز کرنے کی ہدایت دی گئی ہے۔

وزیر اعلیٰ نے تمام جوائنٹ کمشنروں کو ہدایت دی کہ وہ اپنے اپنے حلقوں میں ٹیکس وصولی کے اہداف ہر صورت حاصل کریں، ٹیکس ریٹرن بروقت داخل کرانے کو یقینی بنائیں اور مقررہ مدت میں ریٹرن داخل نہ کرنے والوں کے خلاف کارروائی کریں۔

انہوں نے کہا کہ زیر التوا اپیلوں کو جلد نمٹایا جائے اور ٹیکس دہندگان کے مسائل کا زیادہ سے زیادہ آن لائن حل فراہم کرکے نظام کو مزید عوام دوست بنایا جائے تاکہ لوگوں کو دفاتر کے چکر نہ لگانے پڑیں۔

بعد ازاں محکمۂ آبکاری کی جائزہ میٹنگ میں وزیر اعلیٰ نے افسران کو خبردار کیا کہ اگر کسی افسر یا ملازم کے طرزِ عمل سے حکومت یا محکمہ کی ساکھ متاثر ہوئی تو سخت کارروائی کی جائے گی۔

انہوں نے کہا کہ اگر ضرورت پڑی تو محکمۂ آبکاری کے ملازمین کی دیگر محکموں میں تبادلے کے لیے قانون میں بھی ترمیم کی جا سکتی ہے، اس لیے تمام افسران انتہائی ذمہ داری اور دیانت داری سے فرائض انجام دیں۔

وزیر اعلیٰ نے بتایا کہ محکمہ میں AIB نظام کے نفاذ کے بعد بہتر نتائج سامنے آئے ہیں، جبکہ 574 نئی شراب فروشی لائسنسوں کی ای نیلامی کا فیصلہ کیا گیا ہے۔ انہوں نے لائسنس کی تجدید کی فیس دو اقساط میں ادا کرنے کی سہولت فراہم کرنے کی بھی ہدایت دی۔

انہوں نے آخر میں کہا کہ حکومت کی نیک نامی اور عوامی اعتماد کو برقرار رکھنا تمام افسران کی مشترکہ ذمہ داری ہے۔ جو افسران دیانت داری، شفافیت اور پیشہ ورانہ صلاحیت کے ساتھ کام کریں گے، حکومت ان کی مکمل حوصلہ افزائی کرے گی، لیکن بدعنوانی یا غفلت کسی صورت برداشت نہیں کی جائے گی۔