ریاض ، 30/جنوری (ایس او نیوز) سعودی عرب کے مغربی علاقے جیزان کے قریب ایک المناک سڑک حادثے میں کم از کم 15 افراد ہلاک ہوگئے ہیں، جن میں 9  ہندوستانی شہری بھی شامل ہیں۔ میڈیا رپورٹس کے مطابق،  حادثہ اتوار دیر رات کو پیش آیا تھا۔

ذرائع سے ملی اطلاع کے مطابق  حادثہ اُس وقت پیش آیا جب ایک بس مخالف سمت سے آنے والی  ٹریلر سے ٹکراگئی۔ بتایا گیا ہے کہ بس پر 26  افراد سوار تھے جو  ایک ورک سائٹ پر جا رہے تھے۔ حادثہ سعودی عرب کے صوبے عسیر کے علاقے وادی بن ہاشبل میں صبح 6 بجے کے قریب پیش آیا، جو مقدس شہر مکہ مکرمہ کے جنوبی علاقے میں واقع ہے۔

ہلاک ہونے والے 15 افراد میں سے 9 ہندوستانی تھے اور باقی چھ میں تین نیپال اور دیگر تین گھانا کے بتائے گئے ہیں  زخمیوں کوقریبی اسپتال منتقل کر دیا گیا ہے

جدہ میں انڈین کونسلیٹ  نے اس حادثے کی تصدیق کرتے ہوئے ہلاک شدگان کے اہل خانہ سے گہری ہمدردی کا اظہار کیا ہے۔ کونسلیٹ نے اپنے بیان میں کہا، "ہم سعودی عرب کے جیزان کے قریب سڑک حادثے میں 9  ہندوستانی شہریوں کی المناک موت  پر گہرے رنج و غم کا اظہار کرتے ہیں۔ ہم متاثرہ خاندانوں سے دلی تعزیت کرتے ہیں۔" کونسلیٹ نے یہ بھی یقین دہانی کرائی کہ وہ متاثرہ خاندانوں کی مکمل معاونت کر رہا ہے اور مقامی حکام سے رابطے میں ہے۔