بنگلورو ، 6/ جولائی (ایس او نیوز/ایجنسی) کرناٹک کے چیف الیکٹورل آفیسر کے دفتر نے خصوصی جامع نظرثانی (Special Intensive Revision - SIR) مہم سے متعلق 5 جولائی 2026 شام 6 بجے تک کی تازہ پیش رفت جاری کرتے ہوئے بتایا ہے کہ ریاست میں ووٹر فہرست کی نظرثانی کا عمل تیزی سے جاری ہے۔

جاری کردہ پریس ریلیز کے مطابق 16 جون 2026 تک ریاست میں رجسٹرڈ ووٹروں کی کل تعداد 5 کروڑ 54 لاکھ 32 ہزار 314 ہے۔ ووٹر مردم شماری (Enumeration) فارم چھاپ کر تمام بوتھ لیول افسران (BLOs) کو فراہم کر دیے گئے ہیں۔

چیف الیکٹورل آفیسر کے مطابق 30 جون سے 29 جولائی 2026 تک گھر گھر جا کر ووٹروں کی تصدیق (House-to-House Enumeration) اور فارموں کی ڈیجیٹلائزیشن کا عمل جاری رہے گا۔

اعداد و شمار کے مطابق اب تک 3 کروڑ 46 لاکھ 63 ہزار 518 مردم شماری فارم تقسیم کیے جا چکے ہیں، جو مجموعی ہدف کا 62.53 فیصد ہے۔ اسی طرح 25 لاکھ 59 ہزار 90 فارموں کی ڈیجیٹلائزیشن مکمل کی جا چکی ہے، جو کل فارموں کا 4.62 فیصد بنتا ہے۔

رپورٹ کے مطابق ریاست کے 10,343 پولنگ اسٹیشنوں پر فارموں کی تقسیم سو فیصد مکمل ہو چکی ہے، جبکہ 8,822 پولنگ اسٹیشنوں پر 90 فیصد سے زیادہ فارم تقسیم کیے جا چکے ہیں۔

اسی طرح صرف 2 پولنگ اسٹیشنوں پر فارموں کی سو فیصد ڈیجیٹلائزیشن مکمل ہوئی ہے، جبکہ 11 پولنگ اسٹیشنوں پر یہ شرح 90 فیصد سے تجاوز کر چکی ہے۔

الیکشن کمیشن کے مطابق اب تک 1 لاکھ 2 ہزار 415 ووٹروں نے آن لائن فارم جمع کرائے ہیں، جو کل ووٹروں کا 0.18 فیصد ہے۔

نظرثانی کے دوران 47,759 اندراجات کو مختلف وجوہات کی بنیاد پر جانچ کے لیے نشان زد کیا گیا ہے، جن میں 21,757 فوت شدہ ووٹر، 21,404 مستقل طور پر منتقل ہونے والے افراد، 3,683 پہلے سے رجسٹرڈ ووٹر، 678 غیر حاضر یا ناقابلِ شناخت افراد اور 237 دیگر معاملات شامل ہیں۔

چیف الیکٹورل آفیسر کے دفتر نے واضح کیا ہے کہ ووٹر فہرست کی نظرثانی کا عمل مقررہ شیڈول کے مطابق جاری رہے گا اور عوام سے اپیل کی گئی ہے کہ وہ اپنے ووٹ کے اندراج اور تصدیق کے عمل میں بھرپور تعاون کریں تاکہ کوئی بھی اہل شہری اپنے حقِ رائے دہی سے محروم نہ رہے۔