نئی دہلی  ، 27/جنوری (ایس او نیوز /ایجنسی)دہلی اسمبلی انتخابات کے حوالے سے عام آدمی پارٹی کے قومی کنوینر اروند کیجریوال نے اتوار کو جنگ پورہ میں ایک عوامی جلسے سے خطاب کیا۔ اس دوران انہوں نے کہا کہ اگر عام آدمی پارٹی دوبارہ اقتدار میں آئی تو منیش سسودیا کو دہلی کا نائب وزیر اعلیٰ بنایا جائے گا۔ کیجریوال کا یہ اعلان پارٹی کی انتخابی مہم میں ایک اہم موڑ ثابت ہو سکتا ہے۔

کیجریوال نے عوام کو یقین دلایا کہ ان کی حکومت بننے کے بعد منیش سسودیا، جو جنگ پورہ سے امیدوار ہیں، علاقے کے مسائل کے حل کے لیے ہر ممکن کوشش کریں گے۔ انہوں نے دعویٰ کیا کہ جنگ پورہ کے ووٹرز کو یہ فائدہ ہوگا کہ ان کے اسمبلی حلقے کا نمائندہ دہلی حکومت میں اہم عہدے پر ہوگا، جس سے انتظامی معاملات میں آسانی پیدا ہوگی۔

کیجریوال نے کہا کہ کچھ اسمبلی سیٹوں کی تعداد میں کچھ کمی ہو سکتی ہے لیکن عام آدمی پارٹی کی حکومت بننا طے ہے۔ انہوں نے بھارتیہ جنتا پارٹی کے امیدواروں پر تنقید کرتے ہوئے الزام لگایا کہ انہوں نے عوامی مسائل کے حل کے بجائے گندگی اور بدعنوانی کو فروغ دیا۔

ماضی کے حوالے سے بات کرتے ہوئے کیجریوال نے کہا کہ پچھلی بار عام آدمی پارٹی نے 70 میں سے 62 سیٹوں پر کامیابی حاصل کی تھی جبکہ 8 سیٹیں بی جے پی کے حصے میں آئی تھیں۔ انہوں نے بی جے پی کے منتخب اراکین اسمبلی پر الزام لگایا کہ وہ عوام کے مسائل کے بجائے صرف عام آدمی پارٹی کی حکومت کے خلاف سازشوں میں مصروف رہے۔

انہوں نے کہا، "ہم نے متعدد بار بی جے پی سے تعاون کی درخواست کی، تاکہ دہلی کے عوام کے لیے بنیادی سہولیات فراہم کی جا سکیں لیکن انہوں نے کوئی مدد نہیں کی۔ چاہے وہ محلہ کلینک ہوں، سی سی ٹی وی کیمرے لگوانا ہو یا صفائی کے انتظامات، بی جے پی نے ہر بار رکاوٹیں ڈالیں۔‘‘

منیش سسودیا نے بھی جلسے سے خطاب کیا اور دعویٰ کیا کہ عام آدمی پارٹی کی حکومت دوبارہ بننے جا رہی ہے۔ انہوں نے کہا، ’’یہاں تک کہ بی جے پی کے کارکنان بھی مانتے ہیں کہ حکومت عام آدمی پارٹی کی ہی بنے گی، حالانکہ سیٹوں کی تعداد کم ہو سکتی ہے۔‘‘

انہوں نے بی جے پی امیدوار پر ’غنڈہ گردی‘ اور ’پراپرٹی پر قبضے‘ کے الزامات عائد کیے اور کہا کہ جیت کے بعد علاقے میں ترقیاتی کاموں کو یقینی بنایا جائے گا۔