بنگلورو، 29/جنوری (ایس او نیوز/ایجنسی  )کرناٹک ہائی کورٹ نے گزشتہ روز ایک عبوری حکم جاری کرتے ہوئے انفورسمنٹ ڈائریکٹوریٹ (ای ڈی) کے ذریعہ وزیر اعلیٰ سدارامیا کی اہلیہ پاروتی کو میسور اربن ڈیولپمنٹ بورڈ (MUDA) کیس میں مبینہ طور پر ملوث ہونے کے حوالے سے جاری سمن پر روک لگا دی۔ جسٹس ایم ناگ پر اسنانے یہ عبوری حکم اُس درخواست کی سماعت کے دوران دیا جسے وزیر بی ایس سریش اور پاروتی کی طرف سے دائر کیا گیا تھا۔ درخواست میں منی لانڈرنگ کی روک تھام ایکٹ (PMLA) کے تحت دائر کی گئی شکایت اور ایکٹ کی دفعہ 50 کے تحت جاری کردہ سمن کو منسوخ کرنے کی درخواست کی گئی تھی۔

ایڈیشنل سالیسٹر جنرل اروند کامت نے دلائل دیتے ہوئے کہا کہ ای ڈی کو متعلقہ جرائم کی تفصیلات جمع کرنے کے لیے سمن جاری کرنے کا اختیار حاصل ہے۔ تاہم، درخواست گزار کے وکیل نے عدالت میں یہ موقف اختیار کیا کہ سمن اس عدالت میں دائر درخواست کی سماعت کے لیے جاری کیے گئے تھے۔ وکیل کا کہنا تھا کہ ان سمنوں کی بنیاد پر کارروائی عدالت میں زیر سماعت معاملے کی کارروائی میں رکاوٹ ڈال سکتی ہے۔

عدالت نے اس موقع پر کہا کہ ای ڈی کی جانب سے جاری کردہ سمن پر روک لگانی چاہیے کیونکہ اس سے عدالت میں زیر التواء کارروائی متاثر ہو سکتی ہے۔ اس کے بعد عدالت نے 10 فروری تک عبوری حکم امتناعی برقرار رکھنے کا فیصلہ کیا اور معاملے کی مزید سماعت کے لیے 10 فروری کو دوبارہ درج کرنے کا حکم دیا۔ اس وقت تک سمن پر عائد کی گئی روک برقرار رہے گی۔