کاروار/بنگلورو ،12/ نومبر (ایس او نیوز)کرناٹک حکومت نے اتر کنڑا  کے ساحل پر واقع سات ایسے جزیروں کو عالمی سیاحتی نقشے پر لانے کا فیصلہ کیا ہے جو اب تک سیاحوں کی نظروں سے اوجھل رہے ہیں ۔ ریاستی حکومت نے ان جزیروں کو عالمی معیار کے سیاحتی مقامات میں تبدیل کرنے کے لیے 307.71 کروڑ ر وپئے کے ایک بڑے منصوبے کی منظوری دی ہے ۔

یہ منصوبہ 'پبلک پرائیویٹ پارٹنرشپ' (PPP) ماڈل کے تحت نافذ کیا جائے گا ۔ اس کا مقصد بحیرہ عرب میں واقع ان جزیروں میں سیاحت کے امکانات کو بروئے کار لانا ہے، جس کے لیے منصوبہ بند بنیادی ڈھانچہ، ریزارٹس، ایڈونچر سرگرمیاں اور ایک جزیرے سے دوسرے جزیرے تک جانے کی سہولیات فراہم کی جائیں گی ۔ مجوزہ ترقیاتی منصوبے میں تقریباً 310 ہوٹل کے کمرے اور روزانہ تقریباً 2,800 سیاحوں کے قیام کی گنجائش شامل ہے ۔

سرکاری نوٹیفکیشن کے مطابق کاروار، انکولہ اور بھٹکل تعلقوں میں پھیلے ہوئے چھ 'گرین فیلڈ' (نئے سرے سے تیار ہونے والے) اور ایک 'براؤن فیلڈ' (پہلے سے موجود ڈھانچے والے) جزیرے کو 'ڈیزائن، تعمیر، مالی اعانت، آپریشن اور منتقلی' (DBFOT)  ماڈل کے تحت ترقی دی جائے گی۔

اس اقدام کا مقصد ساحلی سیاحت کو فروغ دینے کے لئے  نجی سرمایہ کاری کو راغب کرنا اور خطے میں موجود ان قدرتی سیاحتی مقامات کو ترقی دینا ہے جو اب تک  سیاحتی مقاصد کے لئے  زیادہ تر استعمال نہیں ہو رہے ہیں ۔  

سیاحتی ترقی کے لیے منتخب سات جزیرے : انفراسٹرکچر ڈیولپمنٹ، بندرگاہوں اور اندرونِ ملک آبی نقل و حمل کے محکمے  کے ذرائع کے مطابق ترقی کے لیے منتخب کیے گئے سات جزیرے یہ ہیں: مدھیہ لنگڈھ (سنیاسی جزیرہ)، ہوگ آئی لینڈ، دیوگڑھ (آئسٹر راک)، مونگیراگوڈا، کیری کنڈا، انکانی چیگوڈو اور کورم گڈھ ۔

یہ تمام جزیرے مجموعی طور پر 135.04 ایکڑ رقبے پر محیط ہیں ۔ ان میں سے 59.31 ایکڑ رقبے کو ترقیاتی کاموں کے لیے مختص کیا گیا ہے ۔

مجوزہ سیاحتی بنیادی ڈھانچے میں رہائش اور تفریحی سہولیات شامل ہوں گی، جبکہ ترقی کا پیمانہ مختص کردہ علاقوں اور ماحولیاتی پہلوؤں کو مدنظر رکھتے ہوئے طے کیا جائے گا ۔

کاروار، انکولہ اور بھٹکل تعلقوں میں واقع  ہیں یہ سات جزیرے  :

1۔ مدھیہ لنگڈھ یا مدلی گڈھ جزیرہ (سنیاسی جزیرہ): یہ کاروار تعلقہ میں واقع ہے ۔
2۔  دیوگڈھ جزیرہ (آئسٹر راک جزیرہ): کاروار کے ساحل کے قریب واقع یہ جزیرہ اپنے تاریخی لائٹ ہاؤس کے لیے مشہور ہے۔
3۔  کورم گڈھ جزیرہ:  کچھوے کی شکل کا یہ جزیرہ کاروار کے قریب واقع  ہے ۔ نرسمہا مندر اور ایڈونچر سیاحتی سرگرمیوں کے لیے مشہور ہے ۔  
4۔  مونگیراگوڈا:   کاروار کے علاقے میں واقع ایک انتہائی خوبصورت جزیرہ ہے ۔
5۔  انکانی چیگوڈو :   یہ جزیرہ انکولہ تعلقہ میں واقع ہے ۔
6۔  ہوگ آئی لینڈ :  یہ بھٹکل تعلقہ کے ساحل کے قریب واقع ایک خوبصورت جزیرہ  ہے ۔
7۔  کری کوندا یا کیریکوندا جزیرہ:      بھٹکل تعلقہ میں واقع ایک چھوٹا سا جزیرہ ہے ۔

جزیروں کی سیر ، ریزارٹس اور ایڈونچر ٹورزم کا منصوبہ :حکومت کا مقصد ان جزائر کو 'ایکو ٹورزم' (ماحولیاتی سیاحت) کے مقامات کے طور پر ترقی دینا ہے،  جہاں ریزارٹس، ایڈونچر اسپورٹس اور جزیروں کے درمیان آمد و رفت (island-hopping) کی سہولیات فراہم کی جائیں گی ۔ اس کے ساتھ ساتھ اس بات کو بھی یقینی بنایا جائے گا کہ ان کا قدرتی ماحول محفوظ رہے ۔

توقع ہے کہ اس اقدام سے اتر کنڑا  میں سیاحتی  دلچسپی اور رغبت کو فروغ دینے کی سمت میں ایک نیا پہلو شامل ہوگا ۔

خیال رہے کہ ان سات جزائر کے علاوہ، مرڈیشور کے قریب اسکوبا ڈائیونگ کے لیے ایک مقبول مقام 'نیترانی جزیرہ'  ہے — اور ہوناور کے قریب 'بسواراج درگا جزیرہ'  ہے ۔ یہ دونوں مقامات  پہلے ہی ضلع کے نمایاں جزیروں میں شمار ہوتے ہیں ۔

دیوگڈ ھ  کے لیے سب سے بڑی سرمایہ کاری کی تجویز:ان سات جزائر میں سے  کاروار میں واقع 'دیوگڈھ'  کے لیے سب سے زیادہ، یعنی 74.99 کروڑ روپے کی سرمایہ کاری کی تجویز سامنے آئی ہے ۔ اس کے بعد بھٹکل کا 'ہوگ آئی لینڈ' (Hog Island) ہے جس کے لیے 59.99 کروڑ روپے کی سرمایہ کاری کی تجویز ہے۔

دیگر جزائرمیں مدھیہ لنگڈھ (سنیاسی جزیرہ) کے لئے 45 کروڑ روپے، کورم گڈھ جزیرہ  39.76  کروڑ روپے،  انکانی چیگوڈو  36 کروڑ روپے،  مونگیراگوڈا  27.98 کروڑ روپئے، کیری کوندا کے لئے 23.99 کروڑ روپے   سرمایہ کاری کی جائے گی ۔

محکمے کے ایک انجینئر نے وضاحت کی کہ 'کورم گڈھ ' کی درجہ بندی 'براؤن فیلڈ' (brownfield) جزیرے کے طور پر کی گئی ہے، جس کا مطلب یہ ہے کہ وہاں پہلے سے کچھ بنیادی ڈھانچہ یا ترقیاتی کام موجود ہے۔ جبکہ باقی چھ جزائر جہاں نئے سرے سے بنیادی ڈھانچہ تعمیر کرنے کی ضرورت ہوگی، انہیں 'گرین فیلڈ'   پروجیکٹس کے طور پر زمرہ بند کیا گیا ہے ۔

318 ہوٹل کے کمرے، روزانہ 2,606 سیاحوں کی گنجائش :  اس مجوزہ تبدیلی کے پیمانے کا اندازہ ان جزائر پر منصوبہ بند سیاحتی بنیادی ڈھانچے سے لگایا جا سکتا ہے ۔ ایک عہدیدار نے بتایا کہ "ہمارے ابتدائی تخمینوں کے مطابق ان سات جزائر پر مجموعی طور پر 318 ہوٹل کے کمرے ہوں گے اور یہاں روزانہ 2,606 سیاحوں کی میزبانی کی گنجائش ہوگی ۔ حکومت کو امید ہے کہ وہ اس خطے کے قدرتی پرکشش مقامات کو بروئے کار لاتے ہوئے ساحلی پٹی پر سیاحت پر مبنی ایک نئی معیشت تشکیل دے سکے گی ۔"

نجی ڈیولپرز کا انتخاب مسابقتی بولی کے ذریعے کیا جائے گا : منصوبے کے فریم ورک کے تحت  نجی ڈیولپرز کا انتخاب ایک مسابقتی بولی کے عمل کے ذریعے کیا جائے گا، جس میں آمدنی میں حصے داری  (revenue-sharing)  کی سب سے زیادہ پیشکش کو انتخاب کا بنیادی معیار قرار دیا جائے گا ۔

رعایتی مدت (concession period)  30سال ہوگی، جسے ضروری منظوریوں اور مقررہ شرائط کی تکمیل سے مزید 30 سال کے لیے بڑھایا جا سکتا ہے ۔ بتایا گیا ہے کہ کرناٹک میری ٹائم بورڈ ان منصوبوں کے نفاذ اور نگرانی کے امور سنبھالے گا ۔

اس اقدام سے ریاست کے لیے خاطر خواہ آمدنی بھی حاصل ہونے کی توقع ہے ۔ پہلے سال ادا کی جانے والی کل سالانہ رعایتی فیس کا تخمینہ 8.70 کروڑ روپے لگایا گیا ہے ۔ اس کے علاوہ توقع ہے کہ متعلقہ اتھارٹی رعایتی مدت کے دوران آمدنی میں حصے داری کے معاہدوں کے ذریعے تقریباً 145.87 کروڑ روپے حاصل کرے گی ۔

ماحولیاتی منظوری اور گنجائش کا تعین لازمی  ہے :اگرچہ اس منصوبے میں بڑے پیمانے پر سیاحت کے بنیادی ڈھانچے کا تصور کیا گیا ہے، حکومت نے واضح کیا ہے کہ ترقی ماحولیاتی تحفظ کی قیمت پر نہیں ہونی چاہیے ۔ ڈیویلپرز کو انٹیگریٹڈ آئی لینڈ مینجمنٹ پلانز (IIMPs) تیار کرنے ہوں گے اور بشمول ماحولیات اور جنگلات کے محکموں سے منظوری تمام ضروری قانونی منظوری حاصل کرنی ہوگی ۔

حکومتی نوٹیفکیشن کے مطابق ہر جزیرے پر قابل اجازت ترقی کی حد کا تعین صلاحیت کے جائزوں کے ذریعے کیا جائے گا ۔ ان جائزوں کا مقصد یہ طے کرنا ہے کہ جزیرے اپنے نازک ماحولیاتی نظام کو نقصان پہنچائے بغیر کتنی سیاحتی سرگرمیاں برقرار رکھ سکتے ہیں ۔

عالمی سیاحتی صنعت تیزی سے اپنی توجہ مخصوص ساحلی اور جزیرے کے مقامات کی طرف مبذول کر رہی ہے، کرناٹک اپنے بحیرہ عرب کے ساحلی پٹی کے نسبتاً غیر دریافت شدہ حصے کو ایک بڑے سیاحتی اور اقتصادی اثاثے میں تبدیل کرنے کی کوشش کر رہا ہے ۔

اگر تصور کے مطابق عمل درآمد کیا جاتا ہے تو یہ منصوبہ ان سات غیر معروف جزائر کو بین الاقوامی سیاحت کی روشنی میں لا سکتا ہے، جس سے سرمایہ کاری، روزگار اور ساحلی اقتصادی سرگرمیوں کے نئے مواقع کھلیں گے اور کرناٹک کے سیاحتی منظر نامے کو نمایاں فروغ ملے گا ۔