نئی دہلی ، 27/جنوری (ایس او نیوز /ایجنسی)کانگریس کے صدر ملک ارجن کھڑگے نے اتوار کے روز بھارتیہ جنتا پارٹی (بی جے پی) کی قیادت والی مرکزی حکومت کو سخت تنقید کا نشانہ بنایا۔ انہوں نے حکومت پر آئینی اقدار کو کمزور کرنے اور اقتصادی مسائل پر ناکامی کا الزام عائد کیا۔ کھڑگے کا کہنا تھا کہ موجودہ حکومت نے نہ صرف جمہوری اصولوں کو نقصان پہنچایا ہے بلکہ اقتصادی ترقی کے لحاظ سے بھی ملک کو مایوس کن نتائج دیے ہیں۔
یہاں کرناٹک پردیش کانگریس کمیٹی کے دفتر میں ترنگا لہرانے کے بعد کانگریس کارکنوں سے خطاب کرتے ہوئے کھرگے نے آئین کے تحفظ کی ضرورت پر زور دیا اور اندور میں پارٹی کے آئندہ 'گاندھی بھارت' پروگرام کا اعلان کیا۔ ہندوستان کو تیسری سب سے بڑی معیشت بنانے کے وزیر اعظم نریندر مودی کے دعوے پر طنز کرتے ہوئے، انہوں نے کہا، "بڑے بڑے بیانات کے باوجود ہندوستان پانچویں سب سے بڑی معیشت بنا ہوا ہے، جبکہ یہ مقام کانگریس کی قیادت والی متحدہ ترقی پسند اتحاد کی حکومت نے اپنے دور اقتدار میں حاصل کیا تھا۔ انہوں نے الزام لگایا کہ بی جے پی کی اقتصادی پالیسیوں نے غریبوں اور پسماندہ لوگوں کی جدوجہد کو نظر انداز کرتے ہوئے امیروں کی حمایت کی ہے۔
انہوں نے کہا، "کانگریس نے معیشت کی تعمیر کے لئے کام کیا، لیکن بی جے پی کے دور حکومت میں کوئی معنی خیز پیش رفت نہیں ہوئی ہے۔ امیر اور غریب کے درمیان عدم مساوات بڑھتی جا رہی ہے اور توجہ چند منتخب افراد کو فائدہ پہنچانے پر مرکوز ہے۔ انہوں نے بی جے پی حکومت پر جمہوری اداروں کو کمزور کرنے، خود مختار اداروں میں مداخلت اور اقتدار کو مرکزیت دینے کا الزام لگایا۔ وفاقیت کے کمزور ہونے کی طرف اشارہ کرتے ہوئے انہوں نے کہا کہ مرکز اپوزیشن کی حکومت والی ریاستوں کے اختیارات کو کم کر رہا ہے۔ انہوں نے منی پور میں 21 ماہ سے زائد طویل بدامنی جیسے اہم مسائل کو حل کرنے میں بی جے پی کی ناکامی پر بھی روشنی ڈالی، جسے انہوں نے ناقص حکمرانی اور جوابدہی کی کمی کی واضح مثال کے طور پر بیان کیا۔
کھرگے نے 27 جنوری کو مدھیہ پردیش کے اندور میں مہاتما گاندھی اور بی آر امبیڈکر کی وراثت کی یاد میں 'گاندھی بھارت' پروگرام کا اعلان کیا۔ انہوں نے کہا کہ اندور چھاؤنی میں منعقد ہونے والے اس پروگرام میں بڑی بھیڑ جمع ہوگی اور عوام کو بی جے پی لیڈروں کے ذریعہ ملک کے جمہوری اداروں کی آزادی اور اقدار کو پہنچنے والے نقصان سے آگاہ کیا جائے گا۔ کھڑگے نے سماجی انصاف کی لڑائی جاری رکھتے ہوئے ملک کی جمہوری اور اقتصادی بنیادوں کو مضبوط کرنے کے لیے کانگریس پارٹی کے عزم کا اعادہ کیا۔