نئی دہلی، 26/ مارچ (ایس او نیوز /ایجنسی)کانگریس مسلسل مرکزی حکومت سے منریگا میں مزدوروں کے لیے کام کے دن بڑھانے کا مطالبہ کر رہی ہے۔ اسی سلسلے میں 25 مارچ کو لوک سبھا میں قائد حزب اختلاف راہل گاندھی، کانگریس جنرل سکریٹری پرینکا گاندھی اور کیرالہ سمیت دیگر ریاستوں کے کئی اراکین پارلیمنٹ نے منریگا کے تحت بقایہ ادائیگیوں کی فوری اجرائی کا مطالبہ کیا۔ انہوں نے پارلیمنٹ ہاؤس کے ’مکر دوار‘ کے قریب احتجاجی مظاہرہ کرتے ہوئے حکومت پر روزگار گارنٹی منصوبے کو کمزور کرنے کا الزام عائد کیا اور مزدوروں کے حقوق کی بحالی کا مطالبہ کیا۔

اس مظاہرہ میں راہل گاندھی اور پرینکا گاندھی کے علاوہ کانگریس کے تنظیمی جنرل سکریٹری کے سی وینوگوپال، کانگریس کے سینئر لیڈر ششی تھرور اور کچھ دیگر اراکین پارلیمنٹ کی شرکت دیکھنے کو ملی۔ کیرالہ کے وائناڈ سے لوک سبھا رکن پرینکا گاندھی نے اس مظاہرہ کی ویڈیو کلپ اپنے ’ایکس‘ ہینڈل سے شیئر کی ہے۔ انھوں نے بتایا کہ کیرالہ کے اپوزیشن اراکین پارلیمنٹ نے منریگا مزدوروں کو افسوسناک طریقے سے نظر انداز کیے جانے کے خلاف پارلیمنٹ میں مظاہرہ کیا گیا۔ حکومت کی بے حسی کے سبب لاکھوں کنبوں کو ذریعۂ معاش کے بغیر چھوڑ دیا گیا ہے۔ اس عمل سے لوگوں کی غریبی اور تکلیف میں مزید اضافہ ہوا ہے۔

پرینکا گاندھی نے سوشل میڈیا پوسٹ میں لکھا ہے کہ ’’ہم اس بحران پر فوری توجہ دینے اور ان متاثرہ مزدوروں کے لیے انصاف کا مطالبہ کرتے ہیں جو طویل مدت سے زیر التوا مزدوری کی کمی میں گزارا کرنے کے لیے مشقت کر رہے ہیں۔‘‘ پرینکا گاندھی کا کہنا ہے کہ حکومت کو یہ یقینی بنانا چاہیے کہ زیر التوا مزدوری کی رقم فوری جاری ہو، بڑھتی مہنگائی سے نمٹنے کے لیے مزدوری میں اضافہ بھی ضروری ہے اور کام کے دنوں کو بڑھا کر 150 دن بھی کیا جانا چاہیے۔