کولکاتہ، 20/اکتوبر (ایس او نیوز /ایجنسی)مغربی بنگال میں وزیر اعلیٰ ممتا بنرجی کی قیادت میں ترنمول کانگریس نے اتوار (20 اکتوبر 2024) کو اسمبلی ضمنی انتخابات کے لیے امیدواروں کی فہرست جاری کی ہے۔ اس فہرست میں مجموعی طور پر چھ امیدواروں کے نام شامل کیے گئے ہیں، جن میں سیتائی حلقے سے سنگیتا رائے کو ٹکٹ دیا گیا ہے۔ ٹی ایم سی نے اس ضمنی انتخاب میں اپنی مضبوطی کو برقرار رکھنے کے لیے اپنی حکمت عملی کا اعلان کیا ہے۔

وہیں مداریہاٹ درج فہرست ذات کی ریزرو سیٹ سے جئے پرکاش ٹوپو، تلڈنگرا سے فالگونی سنگھابو، مدنی پور سے سوجوئے ہاجرا، ہروا سے شیخ ربیع الاسلام اور نئی ہاٹی سے سنت ڈے کو ٹکٹ دیا گیا ہے۔ ٹی ایم سی سے ایک دن پہلے، بھارتیہ جنتا پارٹی (بی جے پی) نے ہفتہ (19 اکتوبر 2024) کو مغربی بنگال کی چھ اسمبلی سیٹوں کے لیے امیدواروں کا اعلان کیا۔

بی جے پی نے نئی ہاٹی سے روپک مترا، ہروا سے بمل داس، مداریہاٹ سے راہل لوہار، مدنی پور سے سبھاجیت رائے، تلڈنگرا سے اننیا رائے چکرورتی اور سیتائی سے دیپک کمار رائے کو میدان میں اتارا ہے۔ اپوزیشن بائیں محاذ اور کانگریس نے ابھی تک امیدواروں کا اعلان نہیں کیا ہے۔ ریاست کی چھ سیٹوں پر 13 نومبر کو ضمنی انتخابات ہوں گے۔

جن حلقوں میں ضمنی انتخابات ہونے والے ہیں ان میں علی پور دوار ضلع میں مداریہاٹ، کوچ بہار میں سیتائی، شمالی 24 پرگنہ میں نئی ہاٹی اور ہاروا، بنکورا میں تلڈنگرا اور مغربی مدنی پور ضلع میں مدنی پور شامل ہیں۔ مغربی بنگال کے ان ضمنی انتخابات کے نتائج 23 نومبر کو سامنے آئیں گے۔

الیکشن کمیشن آف انڈیا نے مہاراشٹرا اور جھارکھنڈ کے اسمبلی انتخابات کی تاریخوں کا اعلان 15 اکتوبر کو کیا تھا۔ اس دوران الیکشن کمیشن نے 13 ریاستوں میں 47 اسمبلی سیٹوں پر ہونے والے ضمنی انتخابات کی تاریخوں کا بھی اعلان کیا۔