بیروت، 8/اکتوبر (ایس او نیوز /ایجنسی) اسرائیلی فوج مسلسل لبنان میں حزب اللہ کے ٹھکانوں کو نشانہ بنا رہی ہے، جس سے لبنان میں وسیع پیمانے پر تباہی ہوئی ہے۔ حالیہ صورتحال میں اسرائیلی دفاعی فوج نے اعلان کیا ہے کہ وہ جلد ہی لبنان کے جنوبی ساحل پر ایک نئی مہم شروع کرنے والی ہے۔ اس سلسلے میں اسرائیلی فوج نے بحیرہ روم کے 60 کلومیٹر کے علاقے میں رہائشیوں اور ماہی گیروں کو ساحل سے دور رہنے کی ہدایت جاری کی ہے۔ تاہم، فوج کے بیان میں اس مہم کی نوعیت کے بارے میں کوئی تفصیلات نہیں دی گئیں۔

اس وقت اسرائیلی فوج حزب اللہ کے خلاف فوجی مہم کے تحت جنوبی لبنان میں فضائی حملے کرنے کے ساتھ ہی سرحدی علاقوں میں زمینی کارروائی بھی کر رہی ہے۔ فوج نے ایک بیان میں لبنان کی اوالی ندی کے جنوب میں رہنے والے لوگوں سے کہا ہے کہ وہ اپنے تحفظ کے پیش نظر سمندری ساحلوں سے دور رہیں۔

قابل ذکر ہے کہ لبنان پر اسرائیل کی طرف سے مسلسل حملے جاری ہیں۔ پیر کو بھی جنوبی لبنان پر اسرائیل نے ایک بڑا حملہ کیا تھا جس میں 10 فائر بریگیڈ ملازمین کی موت ہوگئی تھی۔ لبنان کی وزارت صحت نے اس حملے کے بعد کہا تھا کہ ملبہ کے نیچے اور بھی لوگ دبے ہوئے ہیں۔ وزارت نے مرنے والوں کی تعداد بڑھنے کا اندیشہ بھی ظاہر کیا تھا۔ اس سلسلے میں کہا گیا تھا کہ فائربریگیڈ ملازمین باراچت شہر میں ایک میونسپلٹی بلڈنگ میں تھے۔ حملہ اس وقت ہوا جب فائربریگیڈ ملازمین ایک راحت و بچاؤ مہم پر نکلنے کی تیاری کر رہے تھے۔

ادھر اسرائیلی فوج نے بھی کہا ہے کہ حزب اللہ نے لبنان سے پیر کو 190 راکیٹس داغے۔ اس حملے میں کم سے کم 9 لوگ زخمی ہوئے ہیں۔ اس کے علاوہ بنیادی خدمات کو نقصان پہنچا ہے۔ اسرائیلی فوج نے کہا کہ ہائی وے اور کئی گھروں پر سیدھے حملے کیے گئے۔