نئی دہلی  ، 25/ فرور ی (ایس او نیوز/ایجنسی )فروری کا مہینہ اختتام کی جانب بڑھ رہا ہے اور ملک کی مختلف ریاستوں میں سردی کا زور کم ہونے لگا ہے۔ اگرچہ صبح و شام ہلکی ٹھنڈ اور کہرے کی موجودگی برقرار ہے، مگر اب موسم میں تبدیلی کے آثار نمایاں ہو رہے ہیں۔ محکمہ موسمیات نے پیش گوئی کی ہے کہ کچھ ریاستوں میں بارش ہونے کا امکان ہے، جس سے درجہ حرارت میں مزید اتار چڑھاؤ آ سکتا ہے۔

محکمہ موسمیات کی رپورٹ کے مطابق اگلے کچھ دنوں تک پورے شمالی ہند میں موسم میں بدلاؤ دیکھنے کو ملے گا۔ آئی ایم ڈی نے شمال-مغربی ہند کے کئی حصوں میں 25 سے 28 فروری کے درمیان شدید بارش کا امکان ظاہر کیا ہے۔ محکمہ موسمیات کے مطابق ایک فعال ویسٹرن ڈسٹربنس اس مدت کے دوران جموں و کشمیر، ہماچل پردیش اور اتراکھنڈ کو متاثر کرے گا۔ اس کے علاوہ شمالی ہند کے میدانی علاقوں میں بھی 26 سے 28 فروری کے درمیان ہلکی سے درمیانی سطح کی بارش ہو سکتی ہے۔

آئی ایم ڈی کی رپورٹ کے مطابق جموں و کشمیر، لداخ، گلگت بلتستان اور مظفر آباد میں 25 سے 28 فروری تک شدید بارش اور برفباری ہوگی وہیں ہماچل پردیش میں 26 سے 28 فروری اور اتراکھنڈ میں 27 اور 28 فروری کو بھاری برفباری کے آثار ہیں۔ میدانی علاقوں میں پنجاب، ہریانہ، چنڈی گڑھ، مغربی اتر پردیش اور راجستھان میں 26 فروری سے یکم مارچ تک ہلکی سے درمیانی سطح کی بارش ہو سکتی ہے۔ کچھ علاقوں میں برفباری اور آندھی-طوفان کی بھی وارننگ جاری کی گئی ہے۔

محکمہ موسمیات نے جانکاری دی ہے کہ بہار، ناگالینڈ، منی پور، میزورم اور تریپورہ میں دن کا درجہ حرارت 4-1 ڈگری سیلسیس تک گرا ہے۔ وہیں اترا کھنڈ، چھتیس گڑھ، مغربی بنگال اور تلنگانہ میں بھی کچھ علاقوں میں ہلکی ٹھنڈ محسوس کی گئی ہے۔ راجستھان، جھارکھنڈ، کونکن اور ساحلی آندھرا پردیش میں دن کا درجہ حرارت معمول سے 5-3 ڈگری زیادہ درج کیا گیا۔

ملک کی راجدھانی دہلی کی بات کی جائے تو یہاں کچھ دنوں تک جزوی طور سے بادل چھائے رہیں گے۔ 25 فروری کو صبح میں ہلکی دھند رہ سکتی ہے۔ زیادہ سے زیادہ درجہ حرارت 29-227 ڈگری رہنے کا امکان ہے۔ وہیں 26 فروری کو ہلکی بارش کے آثارے ہیں۔