بھٹکل، 28 اگست (ایس او نیوز): بھٹکل کے پڑوسی تعلقہ ہوناور کے دوڈّگنڈا گاؤں میں ایک شخص نے مبینہ طور پر اپنی بیوی کا گلا گھونٹ کر قتل کردیا اور واقعے کو قدرتی موت کا رنگ دینے کے لیے دل کا دورہ پڑنے کی کہانی گھڑی۔ پولیس نے معاملے کی تفتیش کے بعد شوہر کو گرفتار کرلیا ہے۔
گرفتار ملزم کی شناخت گنپتی منجوناتھ نائک کے طور پر کی گئی ہے، جبکہ مقتولہ کی شناخت اس کی 27 سالہ بیوی منگلا گنپتی نائک کے طور پر ہوئی ہے۔
ذرائع کے مطابق واقعہ اس وقت پیش آیا جب گنپتی مبینہ طور پر شراب کے نشے میں گھر پہنچا۔ رات کے وقت منگلا سو رہی تھی کہ ملزم نے مبینہ طور پر اس کا گلا دبا کر اسے موت کے گھاٹ اتار دیا۔ بیوی کی موت یقینی بنانے کے بعد اس نے اہل خانہ اور دیگر افراد کو یہ باور کرانے کی کوشش کی کہ منگلا کی اچانک طبیعت خراب ہوئی اور اسے دل کا دورہ پڑنے سے موت واقع ہوگئی۔
تاہم، منگلا کی بہن کو اس موت پر شبہ ہوا۔ اس کا کہنا تھا کہ اس کی بہن صحت مند تھی اور اچانک دل کا دورہ پڑنے سے اس کی موت ہونا مشکوک ہے۔ اس سلسلے میں پولیس کو اطلاع دی گئی، جس کے بعد منکی پولیس نے معاملے کی تحقیقات شروع کیں۔
تفتیش کے دوران پولیس نے شوہر گنپتی کو شک کی بنیاد پر حراست میں لے کر پوچھ تاچھ کی۔ پولیس کے مطابق، پوچھ تاچھ کے دوران ملزم نے اپنی بیوی کو قتل کرنے کا اعتراف کرلیا۔ اس کے بعد منکی پولیس اسٹیشن میں قتل کا مقدمہ درج کرتے ہوئے اسے گرفتار کرلیا گیا۔
پولیس نے ملزم کو عدالت میں پیش کیا، جہاں سے اسے عدالتی تحویل میں بھیج دیا گیا ہے۔ واقعے کے اصل محرکات، قتل سے پہلے میاں بیوی کے درمیان کسی تنازع اور دیگر پہلوؤں کے بارے میں پولیس کی مزید تفتیش جاری ہے۔
پولیس کی ابتدائی تحقیقات کے مطابق، ملزم نے قتل کے بعد اسے طبعی موت ظاہر کرنے کی کوشش کی تھی، تاہم مقتولہ کے اہل خانہ کے شبہ اور پولیس کی تحقیقات کے نتیجے میں معاملے کا انکشاف ہوا۔