نئی دہلی   ، 19/فروری (ایس او نیوز/ایجنسی )راجدھانی دہلی میں موسم کا مزاج بدلنے والا ہے۔ دراصل بدھ کو دن بھر جزوی طور پر بادل چھائے رہیں گے اور کئی مقامات پر ہلکی بارش ہونے کا امکان ہے۔ محکمہ موسمیات کا کہنا ہے کہ اگلے تین دنوں تک بادلوں کی آمد و رفت لگی رہ سکتی ہے۔ بارش سے درجہ حرارت میں بھی کچھ کمی ہونے کا امکان ہے۔ جمعرات کو بھی صبح میں ہلکے بادل نظر آ سکتے ہیں۔ جمعہ کو ہلکی بارش کے دوران 20 سے 30 کلومیٹر فی گھنٹے کی رفتار سے تیز ہوائیں چل سکتی ہیں۔ اس دوران درجہ حرارت 26 سے 28 ڈگری سیلسیس کے آس پاس رہنے کی امید ہے۔

محکمہ موسمیات کا کہنا ہے کہ 21 سے 24 فروری کے دوران کم سے کم درجہ حرارت 10 سے 12 ڈگری سیلسیس کے قریب درج کیا جا سکتا ہے۔ 22 اور 23 فروری کو زیادہ سے زیادہ درجہ حرارت 27 سے 29 ڈگری سیلسیس رہنے کا امکان ہے۔ وہیں 24 فروری کو زیادہ سے زیادہ درجہ حرارت 28 سے 30 ڈگری سیلسیس کے آس پاس ریکارڈ کیا جا سکتا ہے۔

راجدھانی میں آلودگی کی بات کی جائے تو منگل کو اس کی سطح خراب زمرے میں درج کی گئی۔ کئی جگہوں پر آلودگی کی سطح 200 سے زیادہ تھی۔ سی پی سی بی سے ملی اطلاع کے مطابق شام 4 بجے تک آلودگی کی سطح 209 ریکارڈ کی گئی۔ ایک دن پہلے پیر کو یہ 231 تھی۔ 24 گھنٹے کے اندر اس میں 22 پوائنٹس کی گراوٹ آئی ہے۔ موسم میں ہونے والی تبدیلی سے اگلے کئی دن اے کیو آئی 200 سے نیچے یعنی درمیانے زمرے میں رہ سکتا ہے۔

ادھر ہماچل پردیش میں بھی بدھ کی رات سے جمعہ تک بارش اور برفباری کے آثار ہیں۔ محکمہ موسمیات کے مطابق کوفری، نارکنڈا، منالی، سولنگویلی، ڈلہوزی، سسو اور آس پاس کے علاقوں سمیت زیادہ تر سیاحتی مقامات پر بارش و ہلکی برفباری ہو سکتی ہے۔ اس کے ساتھ ہی محکمہ نے تیز ہواؤں کے ساتھ بجلی گرنے کی بھی وارننگ جاری کی ہے۔ اب ریاست میں طویل عرصے سے چل رہی خشک سالی سے راحت ملنے کی امید ہے۔