موڈاسا ،  16 / اپریل (ایس او نیوز/ایجنسی) کانگریس کے سرکردہ لیڈر اور لوک سبھا میں اپوزیشن کے رہنما راہل گاندھی نے گجرات کے موڈاسا علاقے میں پارٹی کارکنوں کے ایک اہم اجلاس سے خطاب کیا۔ اس موقع پر انہوں نے دو ٹوک انداز میں کہا کہ ’’بی جے پی اور آر ایس ایس کے خلاف جدوجہد کی شروعات گجرات سے ہوگی، اور یہی ریاست تبدیلی کی بنیاد بنے گی۔‘‘

انہوں نے کہا کہ یہ صرف ایک سیاسی لڑائی نہیں بلکہ نظریاتی جنگ ہے۔ ملک میں صرف دو نظریاتی پارٹیاں ہیں—بی جے پی اور کانگریس۔ راہل گاندھی نے دعویٰ کیا کہ صرف کانگریس پارٹی ہی بی جے پی اور آر ایس ایس کا حقیقی متبادل ہے اور انہی کے ذریعے ہندوستان کو فرقہ پرستی سے بچایا جا سکتا ہے۔

راہل گاندھی نے اس موقع پر ’گجرات پروجیکٹ‘ کا اعلان کرتے ہوئے بتایا کہ کانگریس ریاست میں تنظیم کو نئے سرے سے مضبوط کر رہی ہے۔ ان کا کہنا تھا کہ ضلعی صدر ایسا فرد ہوگا جو سمجھوتہ نہیں کرے گا۔ وہ کارکنوں کے ساتھ مل کر ضلع کو چلائے گا اور فیصلہ سازی میں مکمل آزادی رکھے گا۔

انہوں نے کہا کہ کانگریس کا نیا ماڈل یہ ہے کہ جو بھی عوام سے جڑا ہو، جس کی جڑیں بوتھ سطح پر ہوں، اسے قیادت میں جگہ دی جائے۔ راہل گاندھی نے اس بات پر زور دیا کہ ضلعی سطح پر فیصلے ریاستی یا قومی سطح سے تھوپے نہیں جائیں گے بلکہ مقامی سطح پر کارکنان کی رائے سے کیے جائیں گے۔

راہل گاندھی نے کہا کہ جو لوگ ایم ایل اے یا ایم پی بننے کے بعد تنظیم سے دور ہو جاتے ہیں، ان کے رویے میں تبدیلی لانے کی ضرورت ہے۔ انہوں نے یہ بھی کہا کہ پارٹی میں نئی نسل کو لانا وقت کی اہم ضرورت ہے، اور ایسے لوگوں کو پہچاننا ہوگا جو عوام سے جڑے ہوئے ہیں۔

راہل گاندھی نے کارکنوں کی حوصلہ افزائی کرتے ہوئے کہا کہ "آپ گجرات میں کانگریس پارٹی کے لیے لڑ رہے ہیں، آپ کو شاید پورے ملک سے زیادہ مشکلات جھیلنی پڑتی ہیں، لیکن آپ نے پارٹی کا پرچم نہیں چھوڑا۔"

انہوں نے کہا کہ جو لوگ بی جے پی سے ملے ہوئے ہیں، انہیں پہچان کر محبت کے ساتھ کنارہ کش کیا جائے۔ "نہ نفرت سے، نہ تشدد سے، بلکہ محبت سے کہنا ہے—بھیا، سائیڈ ہو جاؤ، دوسروں کو موقع دو۔"

راہل گاندھی نے اعلان کیا کہ اگر کانگریس گجرات میں کامیاب ہوئی تو جو ضلع بہتر کارکردگی دکھائے گا، اسی کا رہنما وزیر بنے گا۔ انہوں نے واضح کیا کہ جو ضلعی صدر یا رہنما پارٹی کو مضبوط کرے گا، اسے ہی طاقت دی جائے گی۔

آخر میں راہل گاندھی نے کہا، "جہاں بھی میری ضرورت ہوگی، میں گجرات کے ہر کونے میں آپ کے ساتھ حاضر ہوں گا۔" انہوں نے ’سنگھٹن سَرجن ابھیان‘ کے تحت پارٹی کو ازسرنو منظم کرنے کا عزم ظاہر کیا اور کہا کہ عوام کے بھروسے اور کارکنوں کے جذبے کے ساتھ کانگریس ہر چیلنج کا سامنا کرے گی۔