وائناڈ، 24/فروری (ایس او نیوز/ایجنسی)وائناڈ لینڈ سلائیڈنگ سانحہ کو چھ ماہ سے زیادہ کا عرصہ گزر چکا ہے، لیکن حکومت تاحال متاثرین کو بازآبادکاری کی مکمل سہولیات فراہم کرنے میں ناکام رہی ہے۔ اس تاخیر سے پریشان متاثرہ علاقے کے رہائشیوں نے احتجاج کا راستہ اختیار کیا۔ اتوار (23 فروری) کی صبح، پہاڑی ضلع چورل مالا میں حالات کشیدہ ہو گئے جب جولائی 2024 میں لینڈ سلائیڈنگ سے متاثرہ افراد کے اہل خانہ نے بحالی میں تاخیر کے خلاف احتجاجی ریلی نکالنے کی کوشش کی، لیکن پولیس نے انہیں آگے بڑھنے سے روک دیا۔ چور مالا میں بیلی برج کے قریب پولیس اور مظاہرین کے درمیان تلخ کلامی ہوئی، جس کے باعث موقع پر کشیدگی مزید بڑھ گئی۔

واضح ہو کہ یہ احتجاجی ریلی ’جن شبدم ایکشن کمیٹی‘ کی قیادت میں نکالا جا رہا تھا۔ مظاہرین بازآبادکاری عمل میں تیزی لانے کا مطالبہ کر رہے تھے۔ ساتھ ہی 2200 مربع فٹ سے زائد اراضی فراہم کرنے کا مطالبہ بھی کیا جا رہا تھا۔ اسی درمیان ’پپلس ایکشن کمیٹی‘ نے پیر (24 فروری) کو وائناڈ ضلع کلٹریٹ کے سامنے بھوک ہڑتال کا بھی اعلان کیا ہے۔ واضح ہو کہ گزشتہ سال 30 جولائی کو وایناڈ کے منڈکئی اور چورل مالا علاقوں میں ہوئے لینڈ سلائیڈنگ میں 200 سے زائد لوگ ہلاک ہو گئے تھے جب کہ دیگر کئی زخمی ہو گئے تھے۔

قابل ذکر ہے کہ کیرالہ حکومت اب تک بازآبادکاری کی فہرست میں 323 فیملیوں کے نام شامل کیے ہیں۔ پہلی فہرست میں 242 نام تھے اور دوسری فہرست میں 81 نام شامل کیے گئے ہیں۔ یہ آفت زدہ علاقے کے ان فیملیوں کی فہرست ہے جن کے گھروں کو قابل رہائش تسلیم نہیں کیا گیا ہے۔ واضح ہو کہ کیرالہ حکومت نے لینڈ سلائیڈنگ کے بعد بچے ہوئے لوگوں کے لیے ایک جامع منصوبے کو منظوری دی تھی۔ اس منصوبے میں آفت سے متاثر لوگوں کے لیے ایک محفوظ اور پائیدار ماحول فراہم کرنے کے لیے 2 ٹاؤن شپ قائم کرنا شامل ہے۔