چمولی،2/ مارچ (ایس او نیوز /ایجنسی)ہندوستانی فضائیہ کے حکام کے مطابق بدری ناتھ-مانا میں راحت اور بچاؤ مہم دوبارہ شروع کر دی گئی ہے۔ اتراکھنڈ کے چمولی ضلع میں لینڈ سلائیڈ سے متاثرہ علاقوں میں اتوار کو تلاشی مہم کے دوران ایک ایم آئی-17 ہیلی کاپٹر کو ڈرون پر مبنی انٹیلیجنٹ بریڈ آبجیکٹ ڈیٹیکشن سسٹم کی ایئر لفٹنگ کے لیے تیار کیا گیا ہے۔ 28 فروری کو جوشی مٹھ کے مانا گاؤں کے قریب بی آر او کیمپ میں لینڈ سلائیڈ کے بعد سے ہی فضائیہ کا چیتا ہیلی کاپٹر چمولی کے مانا علاقے میں مسلسل ریسکیو آپریشن میں مصروف ہے۔
اترا کھنڈ کے ریاستی آفات انتظامیہ کے سکریٹری ونود کمار سمن نے کہا کہ موسم نے ہمارا ساتھ دیا ہے۔ کل 54 (بی آر او ملازمین) لاپتہ ہوئے تھے، ان میں سے 50 کو بچا لیا گیا ہے اور 4 لوگوں کی جان چلی گئی ہے۔ وہیں 4 لوگ ابھی بھی لاپتہ ہیں اور ان کی تلاشی کے لیے بچاؤ مہم چل رہی ہے۔ ہمیں امید ہے کہ ہم جلد ہی ان کا پتہ لگا لیں گے۔ زخمی بی آر او ملازمین کو آگے مزید علاج کے لیے جوشی مٹھ آرمی اسپتال میں ایئرلفٹ کیا جا رہا ہے۔
اس دوران آج (اتوار کو) وزیر اعلیٰ پشکر سنگھ دھامی چمولی کے مانا میں بی آر او ملازمین کو بچانے کے لیے لگاتار دوسرے دن چل رہے بچاؤ مہم کا جائزہ لینے کے لیے آئی ٹی پارک دہرہ دون میں ڈیزاسٹر کنٹرول روم پہنچے۔
اس سے پہلے ہفتہ کو اتراکھنڈ حکومت نے 28 فروری کو جوشی مٹھ کے مانا گیٹ واقع بی آر او کیمپ کے پاس ہوئے لینڈ سلائڈ پر تفصیلی رپورٹ جاری کی۔ وزیر اعلیٰ پشکر سنگھ دھامی کی ہدایت پر راحت اور بچاؤ کام جنگی سطح پر جاری ہے۔
لینڈ سلائڈ کے بعد برف میں پھنسے ملازمین کی تلاش کے لیے ایس ڈی آر ایف کی ایک ٹیم بھی آج لوکیٹنگ کیمرہ اور تھرمل امیج کیمرہ لے کر روانہ ہوئی۔ انسپکٹر جنرل آف پولیس ایس ڈی آر ایف ردھیم اگروال کی ہدایت کے مطابق مانا میں لینڈ سلائڈ کے دوران لاپتہ ملازمین کی تلاش کے لیے ایس ڈی آر ایف کی ایک اعلیٰ سطح کی ٹیم کو متاثر لوکیٹنگ کیمرہ (وی ایل سی) اور تھرمل امیج کیمرہ کے ساتھ سہسترادھارا سے ہیلی کاپٹر کے ذریعہ جائے حادثہ پر بھیجا گیا ہے۔