نئی دہلی ، 24/فروری (ایس او نیوز/ایجنسی)یو ایس اے آئی ڈی فنڈنگ تنازعہ مزید شدت اختیار کرتا جا رہا ہے۔ امریکی صدر ڈونلڈ ٹرمپ کے حالیہ بیان کے بعد کانگریس نے بی جے پی پر حملے تیز کر دیے ہیں اور اسے کڑی تنقید کا نشانہ بنایا ہے۔ اتوار (23 فروری) کو کانگریس نے الزام لگایا کہ "بی جے پی قومی مفادات کے خلاف کام کر رہی ہے اور غلط معلومات پھیلانے میں ملوث ہے۔" اس معاملے پر وزیر اعظم نریندر مودی اور وزیر خارجہ ایس جے شنکر کو نشانہ بناتے ہوئے، کانگریس نے سوال اٹھایا کہ "جب امریکی صدر ڈونلڈ ٹرمپ اور ایلون مسک ہندوستان کے وقار کو مجروح کر رہے ہیں، تو مودی حکومت خاموش کیوں بیٹھی ہے؟"

اسی ضمن میں کانگرسی جنرل سیکرٹری جے رام رمیش نے سوشل میڈیا پلیٹ فارم ’ایکس‘ پر ایک طویل پوسٹ کیا۔ پوسٹ میں انہوں نے لکھا کہ ’’بی جے پی جھوٹے اور جاہل لوگوں کی جماعت ہے۔ جس 21 ملین ڈالر پر بھاجپائی اور ان کے حامی اچھل رہے تھے، وہ خبر تو جعلی نکلی۔ 2022 میں 21 ملین ڈالر ہندوستان میں ’ووٹر ٹرن آؤٹ‘ کے لیے نہیں بنگلہ دیش کے لیے تھا۔‘‘ علاوہ ازیں انہوں نے کہا کہ ’’ایلون مسک نے فرضی دعویٰ کیا اور ٹرمپ ڈھاکہ-دہلی میں کنفیوژ ہو گئے۔ امت مالویہ نے جھوٹ آگے پھیلایا اور بی جے پی کے حامیوں نے بھی آگے بڑھایا۔‘‘

جے رام رمیش نے آگے کہا کہ ’’ٹرمپ انتظامیہ کے ’ڈی او جی ای‘ نے 16 فروری کو کہا کہ ’یو ایس اے آئی ڈی‘ کے ذریعہ ہندوستان میں ووٹنگ کے لیے 21 ملین ڈالر کی فنڈنگ کو رد کر دیا ہے تب سے بی جے پی نے کانگریس نے من گھڑت الزام عائد کیے ہیں، لیکن اب یہ بات سامنے آ رہی ہیں کہ یہ تو مکمل خبر فرضی ہے۔ جب پیسہ ہندوستان آیا ہی نہیں تو رد کیا ہوگا؟‘‘ علاوہ ازیں انہوں نے کہا کہ ’’اصل میں مکمل تنازعہ ’ڈی او جی ای‘ کی فہرست میں ’یو ایس اے آئی ڈی‘ گرانٹ کے متعلق ہے، جنہیں واشنگٹن میں واقع ’کنسورشیم فار الیکشنز اینڈ پولیٹیکل پروسیس سٹرینتھننگ‘ (سی سی پی پی ایس) کے ذریعہ دیا گیا تھا۔‘‘