بنگلورو، 11؍ ستمبر (ایس او نیوز/ایجنسی) وزیر اعلیٰ سدارامیا کی صدارت میں آج ودھان سودھا کے کانفرنس ہال میں ’’کرشنا اپر پروجیکٹ‘‘ کے تیسرے مرحلے کے نفاذ کے سلسلے میں ایک اہم اجلاس منعقد ہوا، جس میں منصوبے کے مختلف پہلوؤں پر تفصیلی غور و خوض کیا گیا۔
اجلاس میں بتایا گیا کہ کرشنا آبی ٹریبونل – 2 کے فیصلے کے تحت ’’کرشنا اپر پروجیکٹ‘‘ مرحلہ-3 کے نفاذ کے لئے 130 ٹی ایم سی پانی مختص کیا گیا ہے، جس سے تقریباً 5.94 لاکھ ہیکٹیئر زمین کو آبپاشی کی سہولت میسر ہوگی۔ اس منصوبے کے تحت آلمٹی ڈیم کی سطحِ ذخیرہ کو 519 میٹر سے بڑھا کر 524 میٹر کرنے سے اضافی 100 ٹی ایم سی پانی ذخیرہ کرنے کا تخمینہ لگایا گیا ہے۔
منصوبے کے لئے مجموعی طور پر 1,33,867 ایکڑ زمین کے حصول کی ضرورت ہے، جن میں سے 75,563 ایکڑ زمین بیک واٹر میں ڈوبنے والی ہے۔ اب تک 29,566 ایکڑ زمین کے حصول کا فیصلہ صادر کیا جا چکا ہے، جبکہ 59,354 ایکڑ زمین کے اکتساب کی کارروائی باقی ہے۔ حکومت نے طے کیا ہے کہ ڈوبنے والی زمین کا اکتساب دو مرحلوں کے بجائے ایک ہی مرحلے میں مکمل کیا جائے گا۔
وزیر اعلیٰ سدارامیا نے واضح کیا کہ زمین کھونے والے کسانوں کو منصفانہ معاوضہ فراہم کیا جائے گا اور متاثرہ خاندانوں کی مناسب بازآبادکاری کو یقینی بنایا جائے گا۔ اس سلسلے میں کابینہ اجلاس میں حتمی فیصلہ لیا جائے گا۔
ابتدائی طور پر اس منصوبے کی لاگت 51,148 کروڑ روپے متعین کی گئی تھی، جو اب بڑھ کر 87,818 کروڑ روپے تک پہنچ گئی ہے۔ زمین کے اکتساب کے لئے ابتدائی تخمینہ 17,627 کروڑ روپے تھا جو نظرثانی کے بعد 40,557.09 کروڑ روپے ہو گیا ہے۔ علاوہ ازیں منصوبے کے تحت 9 ذیلی سول پروجیکٹس کے لئے 25,122.53 کروڑ روپے کا تخمینہ لگایا گیا ہے۔
وزیر اعلیٰ نے زور دے کر کہا کہ ’’کرشنا اپر پروجیکٹ‘‘ کو ہر حال میں مکمل کیا جائے گا تاکہ کسانوں کی زمینوں تک پانی پہنچایا جا سکے۔