ٹمکورو، 8 مارچ (ایس او نیوز/ایجنسی) کنِگل مین روڈ پر پیش آئے ایک دردناک سڑک حادثے میں دو افراد موقع پر ہی ہلاک ہو گئے۔ اطلاعات کے مطابق تیز رفتار لاری بے قابو ہو کر سڑک کے کنارے موجود درخت اور پل سے ٹکرا گئی۔

پولیس ذرائع کے مطابق حادثہ ٹمکورو یونیورسٹی کے موڑ اور رنگناتھ پور گاؤں کے قریب واقع پل کے پاس پیش آیا۔ بتایا جاتا ہے کہ لاری تمل ناڈو سے پتھر لے کر ٹمکورو سے کنِگل کی سمت جا رہی تھی کہ اچانک ڈرائیور گاڑی پر قابو نہ رکھ سکا۔

ابتدائی تحقیقات سے پتہ چلا ہے کہ لاری تیز رفتاری سے چل رہی تھی اور غالباً ڈرائیور کو نیند آ جانے کے باعث گاڑی بے قابو ہو گئی۔ اسی دوران لاری سڑک کے کنارے موجود ایک بڑے درخت اور پل سے ٹکرا گئی۔ تصادم اتنا شدید تھا کہ ڈرائیور سمیت ایک اور شخص موقع پر ہی دم توڑ دیا۔

پولیس نے بتایا کہ حادثے میں ہلاک ہونے والے دونوں افراد کا تعلق ریاست کیرالہ سے بتایا جا رہا ہے، تاہم ان کی مکمل شناخت کے لیے مزید کارروائی جاری ہے۔

مقامی لوگوں کا کہنا ہے کہ اس سڑک پر اکثر حادثات پیش آتے رہتے ہیں اور اس کی بڑی وجہ گاڑیوں کی تیز رفتاری ہے۔ عوام نے متعلقہ حکام سے مطالبہ کیا ہے کہ اس مسئلے کے حل کے لیے فوری اقدامات کیے جائیں۔

واقعے کی اطلاع ملتے ہی مقامی پولیس موقع پر پہنچ گئی اور جائے حادثہ کا معائنہ کیا۔ اس سلسلے میں پولیس تھانے میں مقدمہ درج کر لیا گیا ہے اور مزید تحقیقات جاری ہیں۔