نئی دہلی ، یکم فروری (ایس او نیوز/ایجنسی)سپریم کورٹ نے جمعہ کے روز الیکشن کمیشن کو ووٹنگ کے ویڈیو کلپس محفوظ رکھنے کی ہدایت دی ہے۔ چیف جسٹس سنجیو کھنہ اور جسٹس سنجے کمار پر مشتمل بینچ نے یہ حکم اس وقت دیا جب پولنگ بوتھ پر زیادہ سے زیادہ ووٹروں کی تعداد 1,200 سے بڑھا کر 1,500 کرنے کے فیصلے کے خلاف درخواستیں زیر التوا ہیں۔ عدالت نے کمیشن کو ہدایت دی کہ جب تک یہ معاملہ زیر سماعت ہے، ووٹنگ کے ویڈیو کلپس کو محفوظ رکھا جائے۔

بنچ نے کہاکہ "ہم مناسب سمجھتے ہیں کہ جواب دہندہ نمبر 1 کو سی سی ٹی وی ریکارڈنگ کو برقرار رکھنے کی ہدایت دیں، جیسا کہ وہ پہلے کر رہے تھے۔‘‘بنچ نے یہ حکم اندو پرکاش سنگھ کی طرف سے دائر پی آئی ایل پر دیا۔ عدالت نے یہ ہدایت اس وقت دی جب الیکشن کمیشن کے وکیل نے پی آئی ایل کا جواب دینے کے لیے وقت طلب کیا اور کمیشن کو حلف نامہ داخل کرنے کے لیے مزید تین ہفتے کا وقت دیا۔ سنگھ نے اگست 2024 میں الیکشن کمیشن کی خط و کتابت کی درستگی کو چیلنج کیا ہے جس میں پورے ہندوستان میں ہر حلقے کے پولنگ اسٹیشنوں پر ووٹروں کی تعداد میں اضافہ کیا گیا تھا۔

15 جنوری کو سپریم کورٹ نے کانگریس جنرل سکریٹری جے رام رمیش کی عرضی پر مرکز اور الیکشن کمیشن سے جواب طلب کیا تھا۔ جے رام  رمیش نے حال ہی میں 1961 کے انتخابی قواعد میں ترمیم کے خلاف درخواست دائر کی تھی، جس میں سی سی ٹی وی تک عوام کی رسائی کی اجازت نہ دینا بھی شامل ہے۔

ایڈوکیٹ سنگھ نے کہا کہ پولنگ بوتھ پر ووٹروں کی تعداد بڑھانے کا فیصلہ من مانی ہے اور یہ کسی اعداد و شمار پر مبنی نہیں ہے۔سنگھ نے کہا کہ انتخابات عام طور پر 11 گھنٹے تک ہوتے ہیں اور ووٹ ڈالنے میں تقریباً 60 سے 90 سیکنڈ لگتے ہیں۔ اس لیے ایک ای وی ایم والے پولنگ بوتھ پر ایک دن میں 660 سے 490 لوگ اپنا ووٹ ڈال سکتے ہیں۔