بنگلورو، 11 اگست (ایس او نیوز/ایجنسی) وزیر اعلیٰ سدارامیا نے کہا ہے کہ ریاست کو عالمی سطح پر جدت، ٹیکنالوجی اور سرمایہ کاری کا مرکز بنانے کے لیے حکومت پُرعزم ہے۔ وہ آج تاج ویسٹ اینڈ ہوٹل، بنگلورو میں منعقدہ "انڈسٹری لیڈرز بریک فاسٹ میٹ" سے خطاب کر رہے تھے، جس میں نائب وزیر اعلیٰ ڈی کے شیوکمار، دیہی ترقیات و پنچایت راج اور آئی ٹی و بایو ٹیک کے وزیر پریانک کھرگے، محکمۂ سائنس و ٹیکنالوجی کی سیکرٹری ڈاکٹر ایکروپ کور، عالمی شراکت دار، صنعت کار، ویزن گروپ کے اراکین اور اسٹارٹ اپ بانی شریک تھے۔

وزیر اعلیٰ نے اس اقدام پر وزیر پریانک کھرگے اور ان کی ٹیم کو مبارکباد دیتے ہوئے کہا کہ اس منصوبے سے کرناٹک ملک کی سب سے بزنس فرینڈلی ریاستوں میں شمار ہوگا۔ انہوں نے بتایا کہ کرناٹک ملک کا سب سے بڑا سافٹ ویئر برآمد کرنے والا صوبہ ہے، جو قومی برآمدات میں 44 فیصد حصہ رکھتا ہے، جبکہ آئی ٹی و آئی ٹی ای ایس سیکٹر ریاستی معیشت کا 26 فیصد ہے۔

سدارامیا نے انکشاف کیا کہ ریاست میں اس وقت 875 گلوبل کیپابیلیٹی سینٹرز فعال ہیں، جو ملک کے مجموعی مراکز کا 30 فیصد ہیں۔ حکومت کا ہدف ہے کہ 2029 تک مزید 500 مراکز قائم کیے جائیں، جس سے 3.5 لاکھ نئی ملازمتیں پیدا ہوں گی اور 50 ارب ڈالر کا معاشی فائدہ ہوگا۔ مصنوعی ذہانت کے میدان میں بنگلورو دنیا کے سرفہرست 5 شہروں میں شامل ہے اور ملک کی 50 فیصد اے آئی افرادی قوت یہاں موجود ہے۔

انہوں نے کہا کہ نیا آئی ٹی پالیسی فریم ورک ریاستی ڈھانچے کو اے آئی کے تقاضوں کے مطابق ڈھالے گا۔ کوانٹم ٹیکنالوجی کے شعبے میں حکومت نے 2035 تک ایشیا کا سب سے بڑا کوانٹم انویشن ہب قائم کرنے کا ہدف مقرر کیا ہے، جس کی متوقع معیشت 20 ارب ڈالر ہوگی۔ اس مقصد کے لیے کوانٹم ہارڈویئر پارکس، انویشن زونز اور ایک عالمی کوانٹم کانکلیو کا اہتمام کیا جائے گا۔

وزیر اعلیٰ نے "کوین سٹی" اور "ہیلتھ سٹی" جیسے بڑے منصوبوں کا اعلان بھی کیا، جنہیں عالمی معیار کے سائنسدانوں، سرمایہ کاروں اور صنعت کاروں کو متوجہ کرنے کے لیے تیار کیا جا رہا ہے۔ ہیلتھ سٹی طبی سیاحت، بایوٹیک تحقیق اور جدید میڈیکل سہولیات کا مرکز ہوگی۔

سدارامیا نے کہا کہ یہ تمام منصوبے ایک مربوط ترقیاتی نیٹ ورک کا حصہ ہیں، جن میں ایگری ٹیک کوریڈورز، الیکٹرک موبلٹی زونز اور گرین انرجی پارکس بھی شامل ہوں گے، تاکہ مستقبل کی ضروریات کے ہر شعبے کو ترقی کا پلیٹ فارم فراہم کیا جا سکے۔ انہوں نے صنعت کاروں، ماہرین اور سرمایہ کاروں سے اپیل کی کہ وہ کرناٹک کو دنیا کے سب سے بڑے مسائل کے حل کا مرکز بنانے میں حکومت کا ساتھ دیں۔