نئی دہلی  ، 14/جنوری (ایس او نیوز /ایجنسی)"ملک میں نظریاتی جنگ چل رہی ہے، ایک طرف وہ لوگ ہیں جو آئین کی حفاظت کا عہد کر چکے ہیں۔ آئین کے پہلے صفحے پر صاف طور پر لکھا ہے کہ ہندوستان ہر ہندوستانی کا ہے، چاہے اس کی ذات کچھ بھی ہو یا مذہب کچھ بھی ہو، اگر وہ ہندوستانی ہے تو اسے اس ملک میں تحفظ ملنا چاہیے۔ دوسری طرف بی جے پی اور آر ایس ایس کے لوگ ہیں جو آئین کو ختم کرنے کی کوشش کر رہے ہیں، نفرت پھیلاتے ہیں اور ایک بھائی کو دوسرے بھائی سے لڑاتے ہیں، ان کو ڈرا کر تقسیم کرتے ہیں۔ یہ بیان کانگریس رکن پارلیمنٹ راہل گاندھی نے دہلی کے سیلم پور میں ’جئے باپو، جئے بھیم، جئے سنویدھان‘ کے نام سے منعقد عوامی جلسے میں دیا۔"

ہزاروں لوگوں کی بھیڑ سے خطاب کرتے ہوئے اور ہاتھوں میں ہندوستانی آئی کی کاپی لہراتے ہوئے راہل گاندھی نے کہا کہ ’’کنیاکماری سے لے کر کشمیر تک 4000 کلومیٹر ہم اس آئین کو بچانے کے لیے چلے تھے۔ امبیڈکر جی کے آئین پر روز نریندر مودی، بی جے پی اور آر ایس ایس کے لوگ حملہ کرتے ہیں۔ میں آپ سے یہ کہنا چاہتا ہوں کہ میری سیاست اور کانگریس پارٹی کی سیاست میں بالکل صاف ہے۔ ہمارے لیے اس ملک کے سبھی لوگ یکساں ہیں۔ اس ملک میں نفرت کو محبت کاٹے گی۔ محبت ہر حال میں تشدد کو کاٹے گی اور ہرائے گی۔‘‘ وہ مزید کہتے ہیں کہ ’’آپ میری پوری زندگی کی سیاست کو اٹھا کر دیکھ لینا، جب تک میں زندہ ہوں اگر کسی بھی ہندوستانی پر حملہ ہوگا، چاہے وہ کوئی بھی ہو، کسی بھی مذہب کا ہو، مسلمان ہو یا ہندو ہو، دلت ہو یا پسماندہ ہو... میں اس کی حفاظت کرتا ہوا ملوں گا۔ میرے لیے ہندوستان کا یہی مطلب ہے کہ اس ملک میں نفرت نہ ہو اور غریب سے غریب شخص، ہر ذات کا شخص بڑا سے بڑا خواب دیکھ سکے۔‘‘

راہل گاندھی نے اپنے خطاب میں وزیر اعظم نریندر مودی اور دہلی کے سابق وزیر اعلیٰ اروند کیجریوال کو کھل کر ہدف تنقید بنایا۔ پی ایم مودی کے تعلق سے راہل گاندھی نے کہا کہ وہ صرف اڈانی جیسے چند امیروں کے لیے کام کر رہے ہیں اور عوام کی بدحالی پر کوئی توجہ نہیں ہے۔ کیجریوال کے تعلق سے راہل گاندھی نے کہا کہ انھوں نے بدعنوانی ختم کرنے کا وعدہ کیا تھا، لیکن سبھی جانتے ہیں کہ ایسا کچھ نہیں ہوا۔ بڑھتی ہوئی مہنگائی کے بارے میں راہل گاندھی نے کہا کہ نریندر مودی اور کیجریوال نے کہا تھا مہنگائی کم کریں گے، لیکن کیا کم ہوئی؟ مہنگائی بڑھتی ہی جا رہی ہے۔ غریب لوگ مزید غریب ہو رہے ہیں اور امیر لوگ مزید امیر ہوتے جا رہے ہیں۔

راہل گاندھی نے اپنی تقریر کے دوران واضح لفظوں میں کہا کہ ’’ہندوستان سب کا ہے، یہ ملک ہر طبقہ کے ساتھ غریبوں کا بھی ہے۔ ہندوستان صرف 15-10 ارب پتیوں کا نہیں ہے۔‘‘ انھوں نے عوام کو اپنی طاقت دکھانے اور دہلی اسمبلی انتخاب میں کانگریس کو کامیاب بنانے کی اپیل بھی کی۔ ساتھ ہی لوک سبھا انتخاب کے نتائج کا تذکرہ کرتے ہوئے کہا کہ ’’آپ نے دیکھا ہوگا کہ پہلے نریندر مودی 400 پار کی بات کر رہے تھے۔ پھر الیکشن کا ریزلٹ آنے کے بعد انھوں نے آئین کو پیشانی سے لگایا۔ عوام نے بتا دیا کہ اگر آئین پر کوئی حملہ کرے گا تو اسے معاف نہیں کیا جائے گا۔‘‘

کانگریس امیدواروں کو کامیاب بنانے کی گزارش کرتے ہوئے راہل گاندھی نے کہا کہ ’’کانگریس پارٹی کو ووٹ دیجیے، اس کو کامیاب بنائیے۔ شیلا دیکشت نے جو کام کیا، وہ کانگریس پارٹی ہی کر سکتی ہے اور کانگریس ہی کرے گی۔ مہنگائی کی سچائی آپ کے سامنے ہے، سڑکوں کی سچائی آپ کے سامنے ہے، آلودگی کی سچائی آپ کے سامنے ہے۔ ان مسائل کو نہ ہی بی جے پی سلجھا سکتی اور نہ ہی عآپ۔ دہلی میں کانگریس کو کامیاب بنائیے تاکہ آپ کے لیے کام کیا جا سکے۔‘‘