گروگرام، 12 جولائی (ایس او نیوز/ایجنسی):قومی سطح کی ٹینس کھلاڑی اور ابھرتی ہوئی ماڈل رادھیکا یادو کے بہیمانہ قتل کے معاملے میں نیا انکشاف سامنے آیا ہے، جہاں اس کے والد دیپک یادو کو عدالت نے ایک دن کی پولیس ریمانڈ پر بھیج دیا ہے۔ پولیس کا کہنا ہے کہ دیپک اپنی بیٹی کے ٹینس اکیڈمی چلانے کے فیصلے سے ناراض تھا، جس پر دونوں کے درمیان جھگڑا ہوا اور غصے میں آکر دیپک نے رادھیکا پر فائرنگ کر دی۔

یہ واقعہ جمعرات کی صبح تقریباً 10:30 بجے سوشانت لوک فیز-2 میں پیش آیا، جب رادھیکا اپنے گھر کے کچن میں تھی۔ ابتدائی تفتیش کے مطابق، بحث کے دوران دیپک نے اپنی لائسنس یافتہ .32 بور کی ریوالور نکالی اور بیٹی پر گولیاں چلائیں، جو اس کی گردن اور کمر میں لگیں، اور وہ موقع پر ہی گر پڑی۔ زخمی حالت میں رادھیکا کو اس کے چچا کلدیپ یادو نے قریبی اسپتال پہنچایا، مگر ڈاکٹروں نے اسے مردہ قرار دے دیا۔

پولیس نے جائے واردات سے ریوالور اور خون کے نمونے ضبط کر کے فرانزک جانچ کے لیے روانہ کیے ہیں۔ دیپک یادو کو فوری گرفتار کر کے عدالت میں پیش کیا گیا، جہاں پولیس نے دو دن کی ریمانڈ کی درخواست کی، لیکن عدالت نے ایک دن کی ریمانڈ منظور کی۔ سیکٹر-56 تھانے کے انچارج راجندر کمار کی سربراہی میں معاملے کی گہرائی سے تفتیش جاری ہے۔

پوچھ گچھ کے دوران دیپک نے جرم کا اعتراف کرتے ہوئے بتایا کہ گاؤں کے لوگ اسے بیٹی کی کمائی پر جینے کا طعنہ دیتے تھے، جس سے وہ ذہنی طور پر دباؤ میں تھا۔ رادھیکا نے کندھے کی چوٹ کے بعد پیشہ ورانہ طور پر ٹینس کھیلنا چھوڑ دیا تھا اور ایک ٹینس اکیڈمی شروع کی تھی تاکہ وہ خودمختار زندگی گزار سکے۔ دیپک کو اس بات پر بھی اعتراض تھا کہ رادھیکا سوشل میڈیا پر سرگرم تھی اور اس کا خیال تھا کہ اس سے خاندان کی عزت پر حرف آ رہا ہے۔

رادھیکا کی والدہ منجو یادو نے پولیس کو بتایا کہ وہ بخار کی وجہ سے آرام کر رہی تھیں اور انہوں نے صرف گولی چلنے کی آواز سنی۔ انہوں نے قتل کے پس پردہ وجوہات سے لاعلمی کا اظہار کیا ہے۔ پولیس کا کہنا ہے کہ ابتدائی طور پر خاندان نے واقعے کو خودکشی قرار دے کر گمراہ کرنے کی کوشش کی، مگر شواہد اور سخت تفتیش کے بعد سچ سامنے آ گیا۔

ادھر رادھیکا یادو کے ساتھ "کاروان" نامی میوزک ویڈیو میں کام کرنے والے گلوکار انعام الحق نے میڈیا سے بات کرتے ہوئے کہا کہ رادھیکا کے ساتھ ان کا صرف پیشہ ورانہ تعلق تھا۔ ان کے مطابق، ویڈیو شوٹ کے بعد رادھیکا نے اپنا انسٹاگرام اکاؤنٹ ڈی ایکٹیویٹ کر دیا تھا، اور جب وجہ پوچھی گئی تو اس نے بتایا کہ وہ کام میں مصروف ہے۔ انعام نے بتایا کہ ان کی رادھیکا سے آخری بات چیت تین چار ماہ قبل ہوئی تھی۔

انعام نے مزید کہا کہ شوٹنگ کے دوران رادھیکا اپنی والدہ کے ساتھ موجود تھی اور انہوں نے صرف کنوینس فیس لی تھی۔ ویڈیو کو زیادہ مقبولیت نہیں ملی، جس پر انہوں نے میوزک ڈائریکٹر سے ویڈیو ہٹانے کی درخواست بھی کی۔ رادھیکا نے بھی ویڈیو کی پروموشن نہیں کی۔

رادھیکا کی موت کی خبر پر انعام الحق نے اپنے انسٹاگرام پر تعزیتی پیغام جاری کرتے ہوئے عوام سے اپیل کی ہے کہ وہ ان سے رابطہ کر کے پریشان نہ کریں، کیونکہ ان کا رادھیکا سے کوئی ذاتی تعلق نہیں تھا۔ ویڈیو "کاروان" ایک سال قبل ایل ایل ایف ریکارڈز کے بینر تلے ریلیز ہوئی تھی جس کے ہدایتکار ذیشان احمد تھے۔

فی الحال دیپک یادو پولیس کی تحویل میں ہے اور پولیس واقعے کے پس منظر میں موجود ذہنی، معاشرتی اور خاندانی دباؤ کے تمام پہلوؤں کی باریکی سے تفتیش کر رہی ہے۔