پٹنہ، 5 جولائی (ایس او نیوز) بہار کے مشہور تاجر گوپال کھیمکا کو جمعہ کی رات پٹنہ میں ان کے گھر کے باہر موٹر سائیکل پر سوار حملہ آور نے گولی مار کر ہلاک کر دیا، پولیس نے ہفتے کو اطلاع دی۔

یہ واقعہ جمعہ کی شب تقریباً 11:40 بجے اس وقت پیش آیا جب کھیمکا اپنی گاڑی سے اترنے ہی والے تھے۔ واقعہ گاندھی میدان علاقہ میں ان کی رہائش گاہ کے گیٹ کے قریب پیش آیا۔

وزیر اعلیٰ نتیش کمار نے ہفتے کے دن ریاست میں امن و امان کی صورت حال پر ہنگامی میٹنگ بلائی، جس میں انہوں نے حکام کو ہدایت دی کہ کھیمکا قتل کیس کی تحقیقات جلد از جلد مکمل کی جائے۔

پٹنہ سنٹرل کی ایس پی دیکشا نے بتایا کہ مقامی تھانے کی پولیس اور گشت پر مامور اہلکار فوراً موقع پر پہنچے اور جائے واردات کو سیل کر کے سیکیور کر لیا۔ انہوں نے مزید بتایا: "تحقیقات جاری ہیں۔ فرانزک ماہرین شواہد اکٹھے کر رہے ہیں اور سی سی ٹی وی فوٹیج کا بھی جائزہ لیا جا رہا ہے۔ جائے وقوعہ سے ایک گولی اور ایک کارتوس برآمد ہوا ہے۔ ابتدائی تحقیقات سے پتہ چلتا ہے کہ کھیمکا کو نامعلوم حملہ آور نے گولی ماری، جو موٹر سائیکل پر سوار تھا۔"

وزیراعلیٰ کے دفتر کی جانب سے جاری بیان میں کہا گیا کہ نتیش کمار نے میٹنگ میں واضح کیا کہ قانون کی حکمرانی این ڈی اے حکومت کی اولین ترجیح ہے، اور "کسی بھی پولیس اہلکار کی لاپروائی پر سخت کارروائی" کا انتباہ دیا۔

دریں اثنا، کھیمکا کے کچھ رشتہ داروں نے الزام لگایا کہ پولیس واقعہ کے تقریباً دو گھنٹے بعد موقع پر پہنچی۔

بہار کے ڈی جی پی ونئے کمار نے پی ٹی آئی سے گفتگو کرتے ہوئے اس الزام کو مسترد کرتے ہوئے کہا:"پولیس کی کارروائی میں تاخیر کا سوال ہی نہیں پیدا ہوتا۔ ہمیں اس واقعہ کی اطلاع رات 12:30 بجے ملی۔ شوٹنگ رات 11:40 پر ہوئی اور اس کے بعد اہل خانہ انہیں کنکر باغ کے ایک پرائیویٹ اسپتال لے گئے، جس میں تقریباً 30–35 منٹ لگے۔ اسپتال سے پولیس کو اطلاع ملی۔ سینئر افسران 12:40 بجے جائے واردات پر پہنچ چکے تھے۔"

ڈی جی پی نے مزید کہا کہ اس کیس کی نگرانی کے لیے ایس آئی ٹی تشکیل دی گئی ہے، جس میں اسپیشل ٹاسک فورس اور ضلع پولیس کے ماہر افسران شامل ہیں۔انہوں نے بتایا کہ قتل کی ممکنہ وجہ پرانی دشمنی ہو سکتی ہے، اور پولیس کو کچھ اہم سراغ بھی ملے ہیں۔

"کھیمکا کے بیٹے کو بھی 2018 میں حاجی پور میں قتل کیا گیا تھا۔ اس کے بعد گوپال کھیمکا کو پیمنٹ کی بنیاد پر سیکورٹی دی گئی تھی، جو اپریل 2024 میں واپس لے لی گئی تھی۔ انہوں نے دوبارہ سیکورٹی کی کوئی درخواست نہیں دی۔ گزشتہ رات کے واقعہ کے بعد ان کے دوسرے بیٹے، جو پیشے سے ڈاکٹر ہیں، کو سیکورٹی فراہم کر دی گئی ہے۔"