کولکاتہ،  12/فروری (ایس او نیوز /ایجنسی)مغربی بنگال میں ترنمول کانگریس اور گورنر سی وی آنند بوس کے درمیان ایک بار پھر کشیدگی بڑھ گئی ہے۔ گورنر نے وزیر اعلیٰ ممتا بنرجی، ترنمول لیڈر کنال گھوش اور دو اراکین اسمبلی کے خلاف ہتک عزت کا نوٹس جاری کیا ہے۔ اس نوٹس میں الزام لگایا گیا ہے کہ ان لیڈران نے گورنر کی ساکھ کو نقصان پہنچایا ہے، اور اگر فوری طور پر معافی نہیں مانگی گئی تو ہر ایک پر 11-11 کروڑ روپے کا ہرجانہ عائد کیا جا سکتا ہے۔ یہ نوٹس ممتا بنرجی کے ساتھ ساتھ نومنتخب رکن اسمبلی سینتیکا بنرجی اور رعیت حسین کو بھی ملا ہے۔ ملک کی سیاسی تاریخ میں یہ پہلا موقع ہے کہ کسی گورنر نے براہ راست وزیر اعلیٰ اور حکمران جماعت کے اراکین اسمبلی کو قانونی نوٹس بھیجا ہو۔

دراصل مئی 2024 میں بنگال کی 2 اسمبلی سیٹوں پر ضمنی انتخاب ہوا، جس میں بارانگر سیٹ سے سینتیکا بنرجی اور بھگوان گولہ سیٹ سے رعیت حسین نے جیت حاصل کی۔ دونوں نو منتخب اراکین کی حلف برداری کے معاملے میں ایک مسئلہ پیدا ہو گیا۔ گورنر نے اسمبلی کے اسپیکر کو حلف دلانے کا حق نہیں دیا۔ گورنر کا کہنا تھا کہ ڈپٹی اسپیکر دونوں کو حلف دلائیں۔ گورنر کے اس فیصلے سے دونوں اراکین اسمبلی ناراض ہو گئے اور ان دونوں نے راج بھون جا کر بھی حلف لینے سے انکار کر دیا۔ ان اراکین اسمبلی کا کہنا تھا کہ راج بھون محفوظ نہیں ہے۔ ایک رپورٹ کے مطابق حلف برداری کے تنازعے کے دوران دونوں اراکین اسمبلی نے گورنر پر سنگین الزامات بھی عائد کیے تھے۔ گورنر اور دونوں اراکین اسمبلی کے درمیان جو رسہ کشی چل رہی تھی اسی بیچ بنگال کی وزیر اعلیٰ ممتا بنرجی نے بھی راج بھون کے حوالے سے سنگین تبصرہ کرتے ہوئے کہا تھا کہ ’’راج بھون خواتین کے لیے محفوظ نہیں ہے۔‘‘

دھیان دینے والی بات یہ ہے کہ کولکاتا ہائی کورٹ نے ممتا بنرجی سے راج بھون کے بارے میں اس طرح کا تبصرے کرنے سے منع کیا تھا۔ بہرحال، گورنر سی وی بوس نے جو ہتک عزت کا نوٹس بھیجا ہے اس میں معافی نہ مانگنے کی صورت میں 11-11 کروڑ روپے کا جرمانہ عائد کرنے کا ذکر ہے۔ ان سب میں دلچسپ بات یہ ہے کہ سینتیکا بنرجی کے پاس مجموعی ملکیت 45 لاکھ اور رعیت حسین سرکار کے پاس مجموعی ملکیت 3 کروڑ روپے ہے۔ وہیں ممتا بنرجی کی مجموعی مالیت 16 لاکھ روپے ہے جس کی جانکاری انہوں نے حال ہی میں دی تھی۔ سینتیکا بنگلہ فلم اداکارہ ہیں تو رعیت حسین سرکار نے ترنمول کانگریس سے سیاسی کیریئر کی شروعات کی ہے۔