بنگلورو ، 24/ فروری (ایس او نیوز /ایجنسی)کرناٹک پولیس نے اسٹیٹ بینک آف انڈیا سرکل کے اشتراک سے کرناٹک اسٹیٹ پولیس رن (کے ایس پی رن) کے تیسرے ایڈیشن کا اعلان کیا ہے، جو اتوار، یکم مارچ 2026 کو منعقد ہوگا۔ یہ دوڑ 2024 میں کرناٹک اسٹیٹ پولیس کی شاندار 50 سالہ خدمات کی تکمیل کے موقع پر شروع کی گئی تھی۔ اس سال کا تھیم ’’نمّا پولیس نمّا ہیمّے‘‘ (ہماری پولیس، ہمارا فخر) ہے، جو ریاست کی حفاظت میں پولیس فورس کی بے لوث خدمات کو خراجِ تحسین پیش کرتا ہے۔

یہ اعلان شہر میں منعقدہ ایک پریس کانفرنس کے دوران کیا گیا، جس میں ڈائریکٹر جنرل و انسپکٹر جنرل آف پولیس و ریاستی پولیس سربراہ، ڈاکٹر ایم۔ اے۔ سلیم، آئی پی ایس اور ایس بی آئی بنگلورو سرکل کی چیف جنرل منیجر جوہی اسمتا سنہا موجود تھیں۔ اس ایونٹ میں ہر عمر کے 10 ہزار سے زائد افراد کی شرکت متوقع ہے۔

دوڑ کی دو کیٹیگریز میں ٹائمڈ 10K رن – پیشہ ور اور تجربہ کار رنرز کے لیے ،آگاہی 5K رن – عوام الناس کے لیے، فٹنس اور سماجی ہم آہنگی کے فروغ کی غرض سےدونوں ریسز کا آغاز اور اختتام ریاست کی تاریخی عمارت ودھان سودھا سے ہوگا اور روٹ کبن پارک سے گزرتا ہوا طے کیا جائے گا۔

یہ ایونٹ ’’گرین بنگلورو‘‘، ’’منشیات سے پاک کرناٹک‘‘ اور ’’سائبر کرائم آگاہی‘‘ جیسے اہم موضوعات کو فروغ دے گا، ساتھ ہی بزرگ شہریوں کو فعال طرزِ زندگی اپنانے کی ترغیب دے گا۔

تقریب کے آغاز پر کرناٹک اسٹیٹ پولیس بینڈ پرفارم کرے گا، جبکہ روٹ پر انفنٹری گھوڑے اور اختتامی مقام پر وردی پوش اہلکار تمغے پیش کریں گے، ہر رجسٹرڈ شریک کو ٹی شرٹ، فنشر میڈل اور مفت ریفریشمنٹس فراہم کیے جائیں گے۔

اس موقع پر ایونٹ کا میڈل اور ٹی شرٹ جاری کرتے ہوئے ڈاکٹر ایم۔ اے۔ سلیم، آئی پی ایس نے کہا کہ ’’کرناٹک اسٹیٹ پولیس رن کا تیسرا ایڈیشن صحت، سماجی ہم آہنگی اور محفوظ و خوشحال کرناٹک کے عزم کا جشن ہے۔ یہ محض ایک دوڑ نہیں بلکہ ہماری پوری پولیس فورس کی انتھک خدمات کو خراجِ تحسین ہے۔ ہم شہریوں سے اپیل کرتے ہیں کہ وہ اس جشن میں شامل ہوں اور ہمارے بہادر افسران کے ساتھ دوڑیں۔‘‘

ایس بی آئی بنگلورو سرکل کی چیف جنرل منیجر جوہی اسمتا سنہا نے کہا کہ’’ہماری پولیس فورس استقامت اور عزم کی علامت ہے۔ کرناٹک اسٹیٹ پولیس کی دور اندیش قیادت قابلِ ستائش ہے جس نے اس مؤثر اقدام کو تصور دیا اور اسے وسعت دی۔ یہ ایونٹ کمیونٹی کو پولیس کے ساتھ جڑنے اور ان کی خدمات کو سراہنے کا منفرد موقع فراہم کرتا ہے۔‘‘

اس دوڑ میں مختلف زمروں میں مجموعی طور پر 18 لاکھ روپے سے زائد انعامی رقم رکھی گئی ہے۔ خصوصی افراد (معذورین) کی شرکت کا بھی خیرمقدم کیا گیا ہے، جو ایونٹ کے جامع اور ہمہ گیر جذبے کی عکاسی کرتا ہے۔ریاست بھر کے تمام ضلعی ہیڈکوارٹرز میں بھی اسی دن متعلقہ پولیس محکمے اس رن کا انعقاد کریں گے۔

ڈاکٹر ۔ ایم۔ اے۔ سلیم نے محکمۂ یوتھ سروسز اور اسٹیٹ بینک آف انڈیا کا شکریہ ادا کرتے ہوئے کہا کہ ان کے مسلسل تعاون سے یہ اقدام کامیابی کی راہ پر گامزن ہے۔