بنگلورو ، 7 /جون (ایس او نیوز / ایجنسی)کرناٹک اسمبلی سے ہونے والے راجیہ سبھا انتخابات کے لیے انڈین نیشنل کانگریس کے امیدواروں نے آج ودھان سودھا میں اپنے کاغذاتِ نامزدگی داخل کیے۔ کانگریس کی جانب سے منصور علی خان اور پون کھیرا نے امیدوار کی حیثیت سے نامزدگی پیش کی، جبکہ آزاد امیدوار بھوجنا سومیا نے بھی اپنے کاغذات جمع کرائے۔

کانگریس امیدواروں نے اسمبلی سیکریٹری اور انتخابی افسر ایم۔ کے۔ وشالاکشی کے روبرو اپنے نامزدگی فارم داخل کیے۔ اس موقع پر کانگریس کے متعدد سینئر رہنما، وزراء، اراکینِ اسمبلی اور پارٹی کارکنان بھی موجود تھے۔

سیاسی حلقوں میں منصور علی خان کی راجیہ سبھا امیدوار کے طور پر نامزدگی کو ریاست میں اقلیتی نمائندگی کے تناظر میں ایک اہم قدم قرار دیا جا رہا ہے۔

دریں اثنا، کرناٹک قانون ساز کونسل کے انتخابات کے لیے بھی کانگریس امیدواروں نے اپنے کاغذاتِ نامزدگی داخل کیے۔ پارٹی کی جانب سے بی۔ کے۔ ہری پرساد، پی۔ وی۔ موہن، تِپّنّا کامکنور اور بی۔ ایس۔ سرینواس نے امیدوار کی حیثیت سے نامزدگی پیش کی۔

تمام امیدواروں نے ودھان سودھا میں انتخابی افسر ایم۔ کے۔ وشالاکشی کے سامنے اپنے کاغذات جمع کرائے۔ اس موقع پر کانگریس قیادت نے اعتماد ظاہر کیا کہ پارٹی کے تمام امیدوار کامیابی حاصل کریں گے۔

سیاسی مبصرین کے مطابق راجیہ سبھا اور قانون ساز کونسل کے یہ انتخابات ریاستی سیاست میں خاص اہمیت رکھتے ہیں، کیونکہ ان کے ذریعے کانگریس اپنی تنظیمی اور پارلیمانی قوت کو مزید مستحکم کرنے کی کوشش کر رہی ہے۔