کلبرگی، 26/ جولائی (ایس او نیوز /ایجنسی) : کلیان کرناٹک علاقائی ترقیاتی بورڈ (KKRDB) کے تحت مالی سال 2025-26 کے لیے 5000 کروڑ روپے مالیت کے ترقیاتی منصوبے کو ریاستی گورنر تھاور چند گہلوٹ نے منظوری دے دی ہے۔ اس اہم پیش رفت سے کلیان کرناٹک کے اضلاع میں ترقیاتی سرگرمیوں کو نئی رفتار ملے گی۔

یہ منصوبہ وزیر اعلیٰ سدارامیا کی طرف سے راج بھون کو منظوری کے لیے بھیجا گیا تھا، جس پر گورنر نے بروقت دستخط کر دیے۔ کلیان کرناٹک علاقائی ترقیاتی بورڈ کے صدر ڈاکٹر اجے سنگھ (دھرم سنگھ) نے ایک پریس ریلیز کے ذریعہ اس کی اطلاع دی۔ انہوں نے گورنر سے ملاقات کر کے ان کا شکریہ بھی ادا کیا۔

اس ترقیاتی منصوبے کی تیاری 10 مئی کو بجٹ اجلاس کے دوران کی گئی تھی، جس میں کلیان کرناٹک سے تعلق رکھنے والے منتخب اراکین اسمبلی، اراکین پارلیمنٹ، وزراء اور دیگر نمائندے شریک ہوئے تھے۔ منصوبہ جولائی کے تیسرے ہفتے میں گورنر کی منظوری کے بعد حتمی شکل اختیار کر چکا ہے۔

ڈاکٹر اجے سنگھ کے مطابق، یہ منصوبہ ڈاکٹر ننجنڈپا کمیٹی کی سفارشات اور CDI انڈیکس کی بنیاد پر تشکیل دیا گیا ہے، جس میں مائیکرو اور میکرو سطح پر ترقیاتی کاموں کے لیے فنڈز کی منصفانہ تقسیم کی گئی ہے۔ منصوبہ بورڈ کے اصول و ضوابط اور ریاست کی مالی حدود کو مدنظر رکھ کر تیار کیا گیا ہے۔

ریاستی محکمہ مالیات نے بھی 5000 کروڑ روپے کی اسکیم کو پہلے ہی منظوری دے دی تھی، جس کے بعد گورنر کی طرف سے جولائی میں دی گئی حتمی منظوری کو کلیان کرناٹک کی ترقی کے لیے ایک بڑا سنگ میل قرار دیا جا رہا ہے۔

اس منظوری کے بعد امید کی جا رہی ہے کہ کلیان کرناٹک کے اضلاع میں بنیادی سہولیات، تعلیم، صحت، بنیادی ڈھانچے اور روزگار سے متعلق منصوبوں پر تیزی سے عمل درآمد کیا جائے گا۔ بورڈ کے صدر نے اس امید کا اظہار کیا کہ اس بجٹ کے ذریعے علاقائی عدم توازن کو کم کرنے میں مدد ملے گی اور پسماندہ علاقوں کو ترقی کی راہ پر گامزن کیا جا سکے گا۔