شیموگہ ، 2/ مارچ (ایس او نیوز /ایجنسی)  وزیر اعلیٰ سدارامیا نے کہا ہے کہ ریاستی حکومت وزارتِ خارجہ کے ساتھ مسلسل رابطے میں ہے اور عرب ممالک میں پھنسے کنڑا یگا  باشندوں کو بحفاظت وطن واپس لانے کے لیے اقدامات کر رہی ہے۔وہ شیموگہ ہوائی اڈے پر میڈیا سے گفتگو کر رہے تھے۔ وزیر اعلیٰ نے بتایا کہ عرب ممالک میں موجود ضلع بلّاری کے تقریباً 30 افراد کی واپسی کے لیے کوششیں جاری ہیں۔ انہوں نے کہا کہ دبئی میں مقیم  ہندوستانی  شہری فی الحال محفوظ ہیں۔

وزیر اعلیٰ کے مطابق عرب ممالک میں رہائش پذیر کنڑا یگا   باشندوں کی سلامتی کے سلسلے میں چیف سکریٹری اور مقامی حکام کے ساتھ مشاورت کی گئی ہے۔ دبئی ایئرپورٹ عارضی طور پر بند ہونے کا حوالہ دیتے ہوئے انہوں نے کہا کہ جیسے ہی اسے دوبارہ کھولا جائے گا، متاثرہ افراد کو بھارت لانے کے لیے مناسب انتظامات کیے جائیں گے۔ انہوں نے یہ بھی بتایا کہ قانون ساز کونسل کے رکن بھوجے گوڑا اس وقت دبئی میں موجود ہیں اور ان سے ٹیلی فون پر بات ہوئی ہے، جہاں وہ ہوٹل میں محفوظ ہیں۔

بین الاقوامی صورتحال پر تبصرہ کرتے ہوئے وزیر اعلیٰ نے کہا کہ امریکہ کی جانب سے ایران پر کیا گیا حملہ غیر ضروری ہے۔ انہوں نے کہا کہ ایک طرف امریکہ امن کی بات کرتا ہے جبکہ دوسری جانب جنگی کارروائیاں انجام دیتا ہے، جو ایک متضاد طرزِ عمل ہے۔ انہوں نے اس مؤقف کی مذمت کی۔

ایران کے رہنما آیت اللہ علی خامنہ ای کے حوالے سے بات کرتے ہوئے وزیر اعلیٰ نے ان کے لیے ابدی سکون کی تمنا ظاہر کی۔

بجلی کی قیمتوں میں ممکنہ اضافے سے متعلق سوال پر وزیر اعلیٰ نے واضح کیا کہ فی الحال حکومت کے سامنے ایسی کوئی تجویز زیرِ غور نہیں ہے۔