دھارواڑ ، 25/ فروری (ایس او نیوز /ایجنسی) ریاست میں خالی سرکاری آسامیوں کو فوری طور پر پُر کرنے کے مطالبے پر اکھل کرناٹک ریاستی طلبہ سنگٹھن کی جانب سے دھارواڑ میں بڑے پیمانے پر احتجاجی مظاہرہ کیا گیا۔ مظاہرین شہر کے سرینگر چوک پر بڑی تعداد میں جمع ہوئے اور حکومت کے خلاف نعرے بازی کرتے ہوئے خالی اسامیوں کی جلد تقرری کا مطالبہ کیا۔
طلبہ تنظیم کے نمائندوں کا کہنا تھا کہ طویل عرصے سے مختلف محکموں میں ہزاروں آسامیاں خالی پڑی ہیں، جس کے باعث تعلیم یافتہ نوجوان بے روزگاری کا شکار ہیں۔ انہوں نے حکومت سے مطالبہ کیا کہ تقرری کے عمل میں تاخیر بند کر کے فوری طور پر بھرتی کا عمل شروع کیا جائے۔
طلبہ تنظیم نے احتجاج کے لیے باقاعدہ اجازت طلب کی تھی، تاہم پولیس نے اجازت دینے سے انکار کر دیا۔ اس کے خلاف تنظیم نے عدالتِ عالیہ سے رجوع کیا۔ عدالت نے پولیس کے ساتھ بات چیت کی ہدایت دیتے ہوئے سماعت کو 3 مارچ تک ملتوی کر دیا۔
مظاہرین کا الزام ہے کہ شہر میں ایک سیاسی جماعت کو احتجاج کی اجازت دی گئی، جبکہ طلبہ کو اجازت نہ دینا امتیازی سلوک ہے۔ اسی کے خلاف طلبہ آج بغیر اجازت سڑکوں پر اتر آئے اور دھرنا دیا۔
احتجاج کے دوران پولیس کی بھاری نفری تعینات رہی تاکہ امن و امان کی صورتِ حال برقرار رکھی جا سکے۔ طلبہ رہنماؤں نے واضح کیا کہ جب تک خالی آسامیوں کی بھرتی کا باضابطہ اعلان نہیں کیا جاتا، ان کی جدوجہد جاری رہے گی۔