حیدرآباد  ، 19/فروری (ایس او نیوز/ایجنسی )وزیر اعظم نریندر مودی اور قطر کے امیر شیخ تمیم بن حمد الثانی کی موجودگی میں دہلی کے حیدر آباد ہاؤس میں دونوں ممالک کے درمیان اسٹریٹجک شراکت داری کو مزید مستحکم کرنے کے لیے ایک اہم معاہدے پر دستخط کیے گئے۔ یہ معاہدہ آمدنی پر ٹیکس کے معاملے میں دوہرے ٹیکس سے بچاؤ اور مالیاتی بے ضابطگیوں کی روک تھام کے لیے ترمیم شدہ اصولوں پر مبنی ہے۔ 18 فروری کو منعقدہ اس اعلیٰ سطحی اجلاس میں دونوں ممالک کے اعلیٰ حکام نے شرکت کی اور مختلف باہمی امور پر تبادلہ خیال کیا۔

میٹنگ سے قبل قطر کے امیر کا راشٹرپتی بھون میں شاندار استقبال کیا گیا۔ اس دوران قطر کے امیر کو راشٹرپتی بھون میں گارڈ آف آنر دیا گیا۔ راشٹرپتی بھون میں امیرِ قطر کا استقبال صدر جمہوریہ دروپدی مرمو اور وزیر اعظم نریندر مودی نے کیا۔ اس کے بعد امیر قطر کو حکومت کے سینئر وزراء سے بھی تعارف کرایا گیا۔ قطر کے امیر صدر جمہوریہ دروپدی مرمو کے ساتھ بھی میٹنگ کریں گے۔ راشٹرپتی بھون میں قطر کے امیر کے اعزاز میں ضیافت کا بھی اہتمام کیا جائے گا۔

واضح ہو کہ امیر قطر تمیم الثانی گزشتہ کل یعنی 17 فروری کی رات کو ہندوستان پہنچے تھے۔ وزیر اعظم نریندر مودی پروٹوکول توڑ کر خود قطر کے امیر کا استقبال کرنے اندرا گاندھی انٹرنیشنل پہنچے تھے۔ اس دوران وزیر خارجہ ایس جے شنکر بھی موجود تھے۔ قطر کے امیر کے ہندوستان دورے کا مقصد ہندوستان اور قطر کے درمیان دوطرفہ تعلقات کو مضبوط کرنا ہے۔ 2024 کے اخیر میں وزیر خارجہ ایس جے شنکر نے بھی قطر کا دورہ کیا تھا۔ اس وقت انہوں نے قطر کے وزیر اعظم اور ہم منصب محمد بن عبد الرحمن بن جاسم الثانی سے ملاقات کی تھی۔ یہ ایک سال میں ایس جے شنکر کا چوتھا دورۂ قطر تھا۔ قابل ذکر ہے کہ امیر قطر کا گزشتہ 10 سالوں میں یہ دوسرا دورۂ ہند ہے اس سے قبل مارچ 2015 میں وہ ہندوستان کے دورے پر آئے تھے۔