نئی دہلی ،4/ مارچ (ایس او نیوز/ایجنسی)مہاکمبھ میلہ کے دوران سوشل میڈیا پر وائرل ہونے والے آئی آئی ٹی بابا ابھے سنگھ کو آج جے پور پولیس نے حراست میں لے لیا۔ اطلاعات کے مطابق، آئی آئی ٹی بابا نے سوشل میڈیا پر خودکشی کی دھمکی دی تھی، جس کے بعد شپرا پتھ تھانہ پولیس نے فوری کارروائی کرتے ہوئے 3 مارچ کو ردھی سدھی پارک کلاسک ہوٹل سے انہیں حراست میں لے لیا۔ پولیس نے حراست میں لینے کے بعد ان سے تفتیش شروع کر دی ہے تاکہ معاملے کی مکمل تفصیلات سامنے آ سکیں۔

میڈیا رپورٹس میں بتایا جا رہا ہے کہ جب پولیس ہوٹل پہنچی تو بابا کے پاس سے گانجہ بھی برآمد کیا۔ یعنی ان کے خلاف این ڈی پی ایس ایکٹ میں کارروائی ہو سکتی ہے۔ آئی آئی ٹی بابا کے ذریعہ خودکشی کی دی گئی دھمکی اور گانجہ برآمد ہونے کے بعد ان سے تفصیلی پوچھ تاچھ کی خبریں ہیں۔ بتایا جا رہا ہے کہ پولیس نے اس معاملے میں ایف آئی آر بھی درج کر لی ہے۔

دلچسپ بات یہ ہے کہ آئی آئی ٹی بابا نے سوشل میڈیا پلیٹ فارم انسٹاگرام پر ایک ویڈیو شیئر کر خود کو حراست میں لیے جانے کا پورا واقعہ بیان کیا ہے۔ انھوں نے کہا کہ ہوٹل میں پولیس آ گئی ہے، میں نے سامان پیک کر لیا ہے، پولیس ایف آئی آر درج کر رہی ہے۔ اس ویڈیو کے کیپشن میں بابا نے لکھا ہے ’’ہمیں سپریم کورٹ اور ہائی کورٹ کے کچھ وکیل چاہئیں، جو کیس کے خلاف لڑ سکیں۔‘‘

اس ویڈیو میں آئی آئی ٹی بابا کہہ رہے ہیں کہ ’’سب بھول گئے نہ، بھولے ناتھ کا پرساد سب ختم۔ میں کچھ نہیں سمجھ رہا۔ یہاں کوئی ہمیں مدد نہیں کر رہا ہے۔ لوگ صرف میسج کرتے ہیں۔ میں رات بھر نہیں سویا۔ مجھے لائیو نہیں کرنے دے رہے۔ اب انھوں نے اجازت دی ہے۔ سنبھالو اپنا سناتن۔ میں دوسرے ملک میں جا کر بھی سناتن بنا سکتا ہوں۔ سچائی کی کوئی کمی نہیں ہے۔ پولیس والے میرے ساتھ ہیپی برتھ ڈے منا رہے ہیں۔ میں تھک چکا ہوں۔ میرے پاس کچھ بھی نہیں بچا ہے۔ نہ پیسے ہیں اور نہ روابط ہیں۔‘‘

گانجہ برآمدگی کے تعلق سے صفائی دیتے ہوئے آئی آئی ٹی بابا نے کہا کہ یہ مہادیو کا پرساد ہے، سبھی بابا پیتے ہیں۔ ان کے اوپر یہ (پولیس والے) کیس کر رہے ہیں۔ پولیس کا کہنا ہے کہ یہ غیر قانونی ہے۔ آئی آئی ٹی بابا مزید کہتے ہیں کہ سادھوؤں نے تو اسے برسرعام پیا ہے، سبھی کے سامنے ثبوت موجود ہے۔ اگر غیر قانونی ہے تو سبھی کو پکڑو۔