نئی دہلی  ، 16/مارچ (ایس او نیوز /ایجنسی ) دہلی سے لے کر اتر پردیش تک ہونے والی بارش کے بعد موسم میں نمایاں تبدیلی آئی ہے۔ دہلی اور اس کے گرد و نواح کی ریاستوں کے رہائشیوں کو ہولی کی شام سے گرمی میں کمی کا سامنا ہے۔ ہفتہ کے روز بھی کئی علاقوں میں بارش ہوئی، جس کی وجہ سے پنجاب، ہریانہ اور مغربی اتر پردیش میں درجہ حرارت میں کمی واقع ہوئی۔ اسی دوران ہریانہ کے چار اضلاع میں ژالہ باری کی اطلاعات بھی سامنے آئی ہیں۔

محکمہ موسمیات کے مطابق آنے والے دنوں میں پہاڑی علاقوں میں اور زیادہ برفباری کا امکان ہے۔ اس سے آمد و رفت میں رکاوٹ آ سکتی ہے۔ اس کے ساتھ ہی ہریانہ، دہلی اور اتر پردیش کے کچھ علاقوں میں تیز آندھی طوفان کی وارننگ دی گئی ہے۔ موسم سائنس مرکز کے ڈائریکٹر بکرم سنگھ کے مطابق اتوار کے بعد موسم میں سدھار آنے کا امکان ہے لیکن اس کے باوجود لوگوں کو ہوشیار رہنے کی صلاح دی گئی ہے۔

محکمہ موسمیات نے آج 25 سے 30 کلومیٹر فی گھنٹہ کی رفتار سے تیز سطحی ہوا چلنے کے ساتھ بہت ہی ہلکی بارش/بوندا باندی ہونے کا امکان ظاہر کیا ہے۔ اتوار کو آسمان میں جزوی طور پر بادل چھائے رہیں گے۔ دہلی میں 17 مارچ کو آئی ایم ڈی نے آسمان صاف رہنے اور صبح کے وقت دھند چھائے رہنے کی پیش گوئی کی ہے۔ اس کے بعد 18 مارچ کو پورے شہر میں جزوی طور سے بادل چھائے رہنے اور دھند رہنے کا امکان ہے۔ ان دونوں دنوں میں 25 سے 30 کلومیٹر فی گھنٹہ کی رفتار سے تیز ہوائیں چلیں گی۔ اس درمیان 19 اور 20 مارچ کو آسمان میں جزوی طور سے بادل چھائے رہیں گے جبکہ 20 تاریخ کو آسمان صاف دکھائی دے گا۔

آئی ایم ڈی کے مطابق شمالی پاکستان اور اس سے سٹے جموں علاقے پر چکرواتی گردش کے طور پر دیکھا جانے والا ویسٹرن ڈسٹربنس اس ہفتہ شمال-مغربی ہندوستان کو متاثر کر سکتا ہے۔ جنوب-مغرب اتر پردیش سے جنوب-مغرب راجستھان تک پھیلی ایک ٹرف لکیر کے جنوبی ہریانہ سے سٹے شمال-مشرقی راجستھان پر سائیکلونک سرکولیشن کے گزرنے سے موسم کے رجحان میں تبدیلی ہو سکتی ہے۔