نئی دہلی ، 4/جنوری (ایس او نیوز /ایجنسی)آج چار جنوری کو دہلی میں شدید سردی کے دوران گھنے دھند کے باعث اورینج الرٹ جاری کر دیا گیا ہے۔ حد نگاہ صفر ہونے کے سبب دہلی ایئرپورٹ پر 400 سے زائد پروازیں تاخیر کا شکار ہو گئی ہیں۔ ہندوستانی محکمہ موسمیات (آئی ایم ڈی) کے مطابق، دہلی ایئرپورٹ پر شدید دھند چھائی ہوئی ہے، جس کی وجہ سے حد نگاہ صفر میٹر ریکارڈ کی گئی ہے۔ روزانہ دہلی ایئرپورٹ پر تقریباً 13 ہزار پروازیں آتی ہیں، اور آج کی صورتحال نے ایئرپورٹ آپریشنز کو متاثر کیا ہے۔

اگر دہلی کے موسم کی بات کی جائے  تو3 جنوری کو یہاں کم سے کم درجہ حرارت سات ڈگری ریکارڈ کیا گیا تھا۔ جبکہ زیادہ سے زیادہ درجہ حرارت 21.2 ڈگری سیلسیس رہا۔ محکمہ موسمیات کے مطابق ہفتہ کو دہلی میں کم سے کم درجہ حرارت صرف سات ڈگری رہے گا، جب کہ زیادہ سے زیادہ درجہ حرارت 21 ڈگری تک رہے گا۔

اس کے علاوہ 5 اور 6 جنوری کو کم سے کم درجہ حرارت دس ڈگری اور زیادہ سے زیادہ درجہ حرارت 18 ڈگری تک جانے کا امکان ہے۔ اس کے علاوہ 7 اور 8 جنوری کو دہلی میں کم سے کم درجہ حرارت سات سے آٹھ ڈگری اور زیادہ سے زیادہ درجہ حرارت 18 ڈگری سیلسیس تک پہنچ سکتا ہے۔ 9 جنوری کو درجہ حرارت میں کمی دیکھی جا سکتی ہے۔ آئی ایم ڈی کے مطابق، 9 جنوری کو دہلی میں کم سے کم درجہ حرارت 5 ڈگری اور زیادہ سے زیادہ درجہ حرارت 16 ڈگری رہنے کا امکان ہے۔

یہی نہیں، محکمہ موسمیات کے مطابق 6 جنوری کو دہلی میں ہلکی سے ہلکی بارش کا امکان ہے، جس کے بعد درجہ حرارت میں کمی دیکھی جا سکتی ہے۔ اس وقت پہاڑوں پر برف باری کی وجہ سے دہلی سمیت شمالی ہندوستان کی کئی ریاستوں میں سردی کا اثر دیکھا جا رہا ہے۔