رانچی، 4/ اگست (ایس او نیوز / ایجنسی) جھارکھنڈ کے سابق وزیراعلیٰ اور جھارکھنڈ مکتی مورچہ (جے ایم ایم) کے بانی شیبو سورین پیر کو 81 سال کی عمر میں انتقال کر گئے۔ ان کے بیٹے اور موجودہ وزیراعلیٰ ہیمنت سورین نے خبر کی تصدیق کرتے ہوئے کہا، "دل میں ایک خالی پن محسوس ہو رہا ہے۔"

شیبو سورین جھارکھنڈ کے مقبول قبائلی رہنما تھے، جنہیں ریاست کی تشکیل میں کلیدی کردار ادا کرنے کے لیے جانا جاتا ہے۔ وہ گردے کی بیماری کے باعث جون کے آخری ہفتے میں دہلی کے سر گنگا رام اسپتال میں داخل کیے گئے تھے۔

وہ تین مرتبہ جھارکھنڈ کے وزیراعلیٰ رہ چکے تھے — مارچ 2005 میں 10 دن کے لیے، اگست 2008 سے جنوری 2009 تک، اور پھر دسمبر 2009 سے مئی 2010 تک۔

صدر جمہوریہ دروپدی مرمو نے ان کے انتقال پر افسوس ظاہر کرتے ہوئے کہا کہ شیبو سورین کا جانا سماجی انصاف اور قبائلی حقوق کے لیے ایک ناقابلِ تلافی نقصان ہے۔ وہ عوامی فلاح و بہبود کے لیے وزیراعلیٰ، مرکزی وزیر اور رکن پارلیمنٹ کے طور پر سرگرم رہے۔