ترواننت پورم ، 25/ فرور ی (ایس او نیوز/ایجنسی )کیرالہ ریاست کے ترواننت پورم کے قریب وینجاراموڈو میں ایک لرزہ خیز واقعہ سامنے آیا ہے۔ ایک 23 سالہ شخص نے پیر کے روز پولیس کے سامنے اعتراف کیا کہ اس نے اپنے 13 سالہ بھائی، 80 سالہ دادی اور ایک خاتون سمیت 6 افراد کو قتل کر دیا ہے۔ مرنے والی خاتون کو ملزم کی معشوقہ بتایا جا رہا ہے۔ پولیس نے شام کے وقت ملزم کو تھانے لایا، جہاں اس نے اپنے خوفناک جرم کا اعتراف کر لیا۔

'ہندوستان' سے ملی خبر کے مطابق پولیس نے بتایا کہ اس سنسنی خیز واقعہ کو انجام دینے والے شخص کا نام عفان ہے اور اسے اسپتال میں داخل کرایا گیا ہے۔ عفان نے دعویٰ کیا تھا کہ اس نے زہر کھا لیا ہے۔ فی الحال پولس اس سنگین جرم کی وجہ تلاش کرنے میں لگ گئی ہے۔

پولیس نے اس واردات میں 5 لوگوں کی موت کی تصدیق کی ہے جبکہ عفان کی ماں کو شدید حالت میں ایک نجی میڈیکل کالج اسپتال میں داخل کرایا گیا ہے۔ عفان نے اپنی ماں پر بھی حملہ کیا تھا۔ مہلوکین میں دو قریبی رشتہ دار بھی ہیں۔

میڈیا رپورٹس کے مطابق عفان نے پولیس کو بتایا ہے کہ اس نے کنبہ کے 6 لوگوں کو مار دیا، کیونکہ وہ اس پر چڑھے قرض کو اتارنے میں آنا کانی کر رہے تھے۔ حالانکہ پولیس کو اس بات پر شبہ ہے اور وہ اس سلسلے میں مزید جانکاری جٹانے میں لگ گئی ہے۔ یہ پتہ لگانے کے لیے کہ ملزم کو ڈرگس کی عادت ہے یا نہیں۔ اس کے فون اور کال ڈیٹیل بھی کھنگالے جا رہے ہیں۔

خبر ہے کہ ملزم نے پہلے 88 سال کی دادی کا دوپہر 3 بجے پنگوڈے میں قتل کیا۔ اس کے بعد وہ ایس این پورم پہنچا، جہاں 58 سال کے ماموں عبداللطیف اور ان کی اہلیہ شاہدہ بیوی کو مارا۔ اس کے بعد وہ گھر آیا اور ماں، 14 سال کے بھائی افضان اور 19 سال کی مبینہ گرل فرینڈ فرشانا کا قتل کیا۔