نئی دہلی ،  16 / اپریل (ایس او نیوز/ایجنسی)بدھ سے دہلی میں 'لو' چلنے اور یلو الرٹ جاری کیے جانے کی پیش گوئی محکمہ موسمیات نے کی تھی، لیکن اب موسم میں تبدیلی کے باعث اس انتباہ کو واپس لے لیا گیا ہے۔ ماہرین کا کہنا ہے کہ آنے والے چار سے پانچ دنوں میں تیز ہوائیں چلنے کے سبب درجہ حرارت میں اچانک اضافہ نہیں ہوگا۔ تاہم، اسکائی میٹ ویدر نے خبردار کیا ہے کہ کچھ مخصوص علاقوں میں ’لو‘ کے آثار اب بھی موجود ہیں۔

محکمہ موسمیات کا اندازہ ہے کہ بدھ کو دن میں آسمان صاف رہے گا۔ تیز دھوپ نکلے گی اور 10 سے 20 کلومیٹر فی گھنٹے کی رفتار سے ہوائیں چلیں گی۔ شام کو جزوی طور پر بادل چھائے رہ سکتے ہیں۔ زیادہ سے زیادہ اور کم سے کم درجہ حرارت بالترتیب 39 ڈگری سیلسیس اور 24 ڈگری سیلسیس رہنے کا امکان ہے۔

منگل کی بات کی جائے تو دن بھر آسمان صاف رہا۔ دھوپ میں بھی تپش تھی۔ کم سے کم درجہ حرارت معمول سے تین ڈگری زیادہ 24.0 ڈگری سیلسیس درج ہوا جبکہ زیادہ سے زیادہ درجہ حرارت معمول سے 1.8 ڈگری زیادہ، 37.9 ڈگری سیلسیس درج کیا گیا۔ ہوا میں نمی کی سطح 66 سے 30 فیصد رہی۔ سب سے زیادہ درجہ حرارت 38.6 ڈگری آیانگر میں اور سب سے کم درجہ حرارت 27.4 ڈگری سیلسیس پیتم پور میں درج ہوا۔

محکمہ موسمیات نے اتر پردیش، بہار، دہلی-این سی آر میں شدید گرمی کے درمیان 18 اپریل سے ایک بار پھر آندھی اور بارش کا امکان ظاہر کیا گیا ہے۔ شمال مشرقی ریاستوں سمیت مغربی بنگال، جھارکھنڈ، آندھرا پردیش سمیت کئی ضلعوں میں آندھی-طوفان کے ساتھ بارش اور آسمانی بجلی گرنے کے واقعات ہو سکتے ہیں۔

وہیں موسمی اتار چڑھاؤ کے درمیان دہلی کی ہوا کے معیار میں سدھار جاری ہے۔ مرکزی آلودگی کنٹرول بورڈ (سی پی سی بی) کے مطابق منگل کو بھی راجدھانی کا اے کیو آئی 180 یعنی درمیانے زمرے میں درج کیا گیا۔ ایک دن پہلے پیر کو یہ 198 تھا یعنی 24 گھنٹے کے اندر اس میں 18 پوائنٹس کی کمی دیکھنے کو ملی ہے۔ این سی آر کے زیادہ تر شہروں میں بھی یہ درمیانے زمرے سے خراب زمرے میں چل رہا ہے۔