نئی دہلی ، 15/فرور ی (ایس او نیوز /ایجنسی)سینٹرل بورڈ آف سیکنڈری ایجوکیشن (سی بی ایس ای) کے 10ویں اور 12ویں جماعت کے امتحانات آج (ہفتہ) ملک بھر میں سخت حفاظتی انتظامات کے ساتھ شروع ہو گئے۔ امتحانات میں شامل ہونے والے طلبا و طالبات میں زبردست جوش و خروش دیکھا جا رہا ہے۔ اس سال تقریباً 44 لاکھ طلبہ ان امتحانات میں شرکت کر رہے ہیں، جن کے لیے ملک بھر میں 7842 امتحانی مراکز قائم کیے گئے ہیں۔ پہلے دن، دسویں جماعت کے طلبہ انگلش (کمیونکیٹیو) اور انگلش (لینگویج اینڈ لٹریچر) کا امتحان دیں گے، جبکہ بارہویں جماعت کا آغاز اینٹرپرینیور شپ کے پرچے سے ہوگا۔ 10ویں کے امتحانات 15 فروری سے 18 مارچ تک اور 12ویں کے امتحانات 15 فروری سے 4 اپریل 2025 تک جاری رہیں گے۔
ادھر میٹرو نے بھی سی بی ایس ای بورڈ امتحان 2025 کے لیے خصوصی اعلان کیا ہے۔ امتحان دینے والے طلبا و طالبات کو میٹرو اسٹیشن پر ٹکٹ لینے اور داخلہ کے لیے فرکسنگ میں ترجیح دی جائے گی۔ یعنی ان دونوں کام میں کم وقت لیا جائے گا۔ 15 فروری سے 4 اپریل 2025 تک سی بی ایس ای بورڈ کی 10ویں اور 12ویں کے امتحان ہوں گے۔ اس دوران دہلی میٹرو ریل کارپوریشن (ڈی ایم آر سی) نے امتحان میں بیٹھنے والے طلبا کے لیے سہل اور پریشانی سے آزاد سفر کو لے کر کچھ سہولتوں کا اعلان کیا ہے۔
تقریباً 3.30 لاکھ طلبا و طالبات اور ہزاروں اسکول ملازمین شہر بھر میں آمد و رفت کریں گے اس لیے ڈی ایم آر سی سی آئی ایس ایف کے ساتھ ساجھیداری کرکے امتحان کے دنوں میں بڑھتی بھیڑ کو قابو میں کرنے کے لیے میٹرو اسٹیشنوں پر خصوصی سہولت کے اقدامات کیے گئے ہیں۔ ڈی ایم آر سی نے طلبا سے اپنے سفر کا منصوبہ پہلے سے بنانے کی گزارش کی ہے۔ ساتھ ہی امیدواروں کو ان کے امتحانات کے لیے نیک خواہشات بھی پیش کی ہے۔
ادھر سی بی ایس ای نے سبجیکٹ اسپیسفک گائیڈ لائن جاری کی ہے جس میں سبجیکٹ کوڈ، کلاس اسپی سی فکیشن، تھیوری اور پریکٹیکل کے لیے زیادہ سے زیادہ نمبر، پروجیکٹ ورک، انٹرنل اسسمینٹ اور جوابی کاپی کے فارمیٹ جیسی اہم جانکاری دی گئی ہے۔ امتحانات کے ضابطہ کے مطابق انعقاد کے لیے اسکولوں کو ان ہدایات پر سختی سے عمل کرنے کی ہدایت دی گئی ہے۔