نئی دہلی، 17/ جون (ایس او نیوز /ایجنسی) کانگریس رہنما سریندر راجپوت نے ایران کی صورتحال پر مرکزی حکومت کی جانب سے جاری ایڈوائزری کو افسوسناک قرار دیتے ہوئے شدید تنقید کی۔ انہوں نے کہا کہ ایسے وقت میں حکومت کا کام اپنے شہریوں کو بچانا ہونا چاہیے، نہ کہ محض ایڈوائزری جاری کر دینا۔ راجپوت نے کہا کہ حکومت ذمہ داری سے بچنے کی کوشش کر رہی ہے جبکہ اسے چاہیے کہ وہ ہر ممکن طریقے سے ہندوستانی شہریوں کو محفوظ نکالنے کی کوشش کرے۔

انہوں نے ماضی کی مثال دیتے ہوئے کہا کہ بی جے پی کا یہ دعویٰ درست نہیں کہ مودی حکومت نے روس-یوکرین جنگ رکوائی تھی۔ انہوں نے سوال کیا کہ اگر وہ ممکن تھا، تو اب ایران کے معاملے میں حکومت بے بس کیوں نظر آ رہی ہے؟ راجپوت نے کہا کہ ’’ہم نے حملہ آور ملک کی مخالفت کی ہے، کسی کا ساتھ نہیں دیا۔ اسرائیل نے پہل کی، ایران کو جواب دینے کا حق ہے لیکن اسے بھی صبر سے کام لینا ہوگا۔‘‘

انہوں نے وزیر اعظم مودی کے کینیڈا دورے پر تبصرہ کرتے ہوئے کہا کہ وزیر اعظم کو وہاں سکھ علیحدگی پسندوں کے خلاف سخت مؤقف اختیار کرنا چاہیے اور کینیڈین حکومت سے انہیں ہندوستان کے حوالے کرنے کی بات کرنی چاہیے۔

اس کے علاوہ سریندر راجپوت نے ذات پر مبنی مردم شماری کے اعلان کو راہل گاندھی کے دباؤ کا نتیجہ قرار دیا، تاہم یہ بھی کہا کہ حکومت نے اب تک جو نوٹیفکیشن جاری کیا ہے، اس میں ’ذات‘ کا ذکر تک نہیں کیا گیا۔ ان کے مطابق اس سے حکومت کا دوہرا رویہ صاف ظاہر ہوتا ہے، جسے کسی بھی قیمت پر قبول نہیں کیا جا سکتا۔