بنگلورو ، 25/ فروری (ایس او نیوز /ایجنسی)وزیر اعلیٰ سدارامیا نے دھارواڑ میں سرکاری ملازمت کے امیدواروں کی جانب سے جاری احتجاج کا سنجیدگی سے نوٹس لیتے ہوئے کہا ہے کہ حکومت نوجوانوں کی تشویش، بے چینی اور غیر یقینی کیفیت کو بخوبی سمجھتی ہے۔ انہوں نے کہا کہ ہر درخواست کے پیچھے ایک خواب، ایک خاندان کی امید اور برسوں کی محنت شامل ہوتی ہے، اور ریاستی حکومت نوجوانوں کے مستقبل کو انتہائی اہمیت دیتی ہے۔
وزیراعلیٰ نے کہا کہ جب موجودہ حکومت نے اقتدار سنبھالا تو ریاست میں 2.64 لاکھ سے زائد سرکاری اسامیاں خالی تھیں۔ ان کے مطابق یہ صورتحال سابقہ بی جے پی حکومت کی طویل غفلت اور بروقت تقرریاں نہ کرنے کا نتیجہ تھی۔ انہوں نے الزام عائد کیا کہ بعض اپوزیشن قائدین طلبہ کو گمراہ کر کے سیاسی فائدہ اٹھانے کی کوشش کر رہے ہیں، جبکہ موجودہ حکومت تقرری کے عمل میں شفافیت اور اعتماد کی بحالی کے لیے پرعزم ہے۔
انہوں نے مزید کہا کہ 2019 سے 2023 کے دوران تقرریوں میں بے ضابطگیوں اور بدعنوانی کے واقعات نے نظام پر عوامی اعتماد کو متاثر کیا، جس کے نتیجے میں خالی آسامیوں کا بوجھ بڑھ گیا۔ علاوہ ازیں اندرونی ریزرویشن سے متعلق قانونی پیچیدگیوں کے باعث بعض تقرریاں عارضی طور پر روکنی پڑیں، کیونکہ یہ معاملہ عدالتوں میں زیرِ غور تھا۔ حکومت نے آئینی تقاضوں اور سماجی انصاف کو مدنظر رکھتے ہوئے قانون کے دائرے میں رہ کر فیصلے کیے۔
وزیراعلیٰ کے مطابق گزشتہ ڈھائی برسوں میں مختلف محکموں میں 40 ہزار سے زائد تقرریاں مکمل کی جا چکی ہیں۔ طویل تاخیر سے متاثر امیدواروں کو راحت دینے کے لیے آئندہ تقرریوں میں عمر کی حد میں پانچ سال سے زائد کی رعایت بھی دی گئی ہے، تاکہ کوئی بھی اہل امیدوار نظامی تاخیر کی وجہ سے محروم نہ رہے۔
انہوں نے یقین دلایا کہ باقی ماندہ آسامیوں کو پُر کرنے کا عمل جاری ہے اور اسے مزید تیز، شفاف اور مقررہ مدت کے اندر مکمل کیا جائے گا۔حکومت آئندہ برسوں میں مزید اسامیوں پر تقرری کے لیے ضروری انتظامی اور پالیسی اقدامات کر رہی ہے تاکہ مستقبل میں ایسی صورتحال دوبارہ پیدا نہ ہو۔
وزیراعلیٰ نے نوجوانوں سے اپیل کی کہ وہ صبر و اعتماد کے ساتھ اپنی تعلیم اور تیاری جاری رکھیں۔ انہوں نے کہا کہ کرناٹک کے نوجوان ریاست کے مستقبل کے معمار ہیں اور حکومت عملی اقدامات کے ذریعے ان کے خوابوں کے تحفظ اور سرکاری ملازمتوں کو باوقار اور قابلِ حصول بنانے کے لیے پرعزم ہے۔