لکھنؤ  ،2/  مارچ (ایس او نیوز /ایجنسی)ریاست کے وزیر اعلیٰ نائب سنگھ سینی نے ہریانہ بورڈ کے امتحانات میں پیپر لیک معاملے پر سخت رویہ اختیار کرتے ہوئے سخت کارروائی کی ہے۔ اس معاملے میں کئی پولیس افسران اور اہلکاروں کے خلاف کارروائی عمل میں لائی جا چکی ہے۔ غفلت برتنے کے الزام میں 25 پولیس افسران اور ملازمین کو معطل کرنے کے احکامات جاری کیے گئے ہیں، جن میں 4 ڈی ایس پیز بھی شامل ہیں۔

چنڈی گڑھ میں، وزیر اعلیٰ نائب سنگھ سینی نے کہا، "پرچہ لیک نہیں ہوا تھا بلکہ یہ آؤٹ ہوا تھا اور اس سلسلے میں تمام ڈی سی اور ایس پیز کو ضروری ہدایات جاری کر دی گئی ہیں۔" امتحان میں شرکت کرنے والے چار باہر کے لوگوں اور آٹھ بچوں کے خلاف ایف آئی آر درج کی گئی ہے۔ مقدمے میں غفلت برتنے والے 25 پولیس افسران و ملازمین کو معطل کرنے کے احکامات جاری کیے گئے ہیں جن میں چار ڈی ایس پیز اور تین ایس ایچ اوز بھی شامل ہیں۔

ان کا مزید کہنا تھا کہ ’’یہ پیپر لیک ہونے کا نہیں بلکہ پیپر آؤٹ کا معاملہ ہے۔ واٹس ایپ سے پیپر آؤٹ ہو  گیا۔ تمام ڈی سیز اور ایس ایس پیز کو احکامات جاری کر دیے گئے ہیں۔ حکومت کی ساکھ پر سوال نہیں اٹھنا چاہیے۔ سرکاری اسکولوں کے 4 اور پرائیویٹ ا سکول کے 1 انویجیلیٹر کے خلاف کارروائی کی گئی۔ سینٹر کے دو سپروائزرس کو بھی معطل کر دیا گیا ہے۔

ہریانہ کے  وزیر اعلیٰ سینی نے کہا کہ اس معاملے کی تحقیقات جاری ہے۔ انہوں نے کہا، "تمام ایس ایس پی اس بات کو یقینی بنائیں گے کہ لوگ امتحانی مرکز سے 500 میٹر دور رہیں۔ ابتدائی تفتیش میں 25 پولیس اہلکار غفلت کے مرتکب پائے گئے اور انہیں معطل کر دیا گیا۔ اگر ریاست میں کہیں بھی ایسا کوئی واقعہ سامنے آتا ہے تو ان کے خلاف کارروائی کی جائے گی۔‘‘

آپ کو بتاتے چلیں کہ ہریانہ بورڈ کے امتحانات میں پیپر لیک ہونے کے کئی معاملے دھوکہ دہی سے پاک امتحان کے محکمہ تعلیم کے دعووں کو بے نقاب کر رہے ہیں۔ جمعرات کو 12ویں جماعت کا انگلش کا پرچہ لیک ہونے کے بعد جمعے کو دسویں جماعت کا ریاضی کا پرچہ لیک ہو گیا۔