پٹنہ، 23 اگست 2025 (ایس او نیوز / ایجنسی) بہار میں ووٹر فہرست کی جاری خصوصی نظرثانی (SIR) کے دوران کمیونسٹ پارٹی آف انڈیا مارکسسٹ لیننسٹ لبریشن (CPIML) کی جانب سے دی گئی دو شکایتوں کو الیکشن کمیشن نے باضابطہ طور پر قبول کر لیا ہے۔ یہ پہلا موقع ہے جب انتخابی فہرست کے ڈرافٹ رول پر کسی سیاسی جماعت کی شکایت کو کمیشن نے ریکارڈ میں شامل کیا ہے۔ دیگر جماعتیں اب تک اپنی دعووں اور اعتراضات کی فہرست شروع نہیں کر سکی ہیں۔

الیکشن کمیشن نے ابھی تک واضح نہیں کیا ہے کہ سی پی آئی ایم ایل کی جانب سے درج یہ دو شکایتیں یا اعتراضات کس نوعیت کے ہیں۔ کمیشن نے وضاحت دی ہے کہ صرف وہی درخواستیں شمار کی جائیں گی جو مقررہ فارم (فارم 6 برائے اندراج، فارم 7 برائے اعتراض) کے مطابق داخل کی جائیں گی، جب کہ عمومی نوعیت کی شکایات کو شمار نہیں کیا جائے گا۔

الیکشن کمیشن کے ذرائع نے بتایا کہ جمعہ کے روز سی پی آئی ایم ایل کی طرف سے مزید چھ فارم باضابطہ فارمیٹ میں موصول ہوئے ہیں۔ یہ پیش رفت ایسے وقت پر ہوئی ہے جب سپریم کورٹ میں اس نظرثانی عمل کو لے کر دائر درخواستوں کی سماعت ہو رہی تھی۔ عدالتِ عظمیٰ نے سیاسی جماعتوں کی جانب سے بروقت کارروائی نہ کرنے پر حیرت ظاہر کی۔ اپوزیشن جماعتوں کا الزام ہے کہ ان کی شکایات کو تسلیم ہی نہیں کیا جا رہا ہے۔

سی پی آئی ایم ایل کے جنرل سکریٹری دپانکر بھٹاچاریہ نے کہا کہ "ہمارے بوتھ لیول ایجنٹس (BLAs) پہلے دن سے ہی شکایتیں دے رہے ہیں لیکن فارمز کی وضاحت واضح نہیں تھی۔ بعد میں چیف الیکٹورل آفیسر نے بتایا کہ فارم 6 کا استعمال غلط اندراج کے ساتھ ساتھ ناانصافی سے کی گئی حذف شدگیوں کے خلاف بھی کیا جا سکتا ہے۔ اس کے باوجود الیکشن کمیشن ہماری شکایتوں کو ’0‘ دکھا رہا تھا۔ بالآخر آج کی سماعت سے ذرا پہلے انہوں نے صرف دو شکایتوں کو تسلیم کیا۔"

انہوں نے مزید کہا کہ پارٹی کے تقریباً 3,000 بوتھ ایجنٹس ہیں، لیکن انتظامیہ نے ان میں سے صرف نصف کے ناموں کو ہی باضابطہ طور پر تسلیم کیا ہے، جس سے شکایت درج کرانے کی صلاحیت محدود ہو گئی ہے۔ الیکشن حکام کے مطابق فی الحال بہار میں سی پی آئی ایم ایل کے 1,496 بوتھ ایجنٹس کو ہی سرکاری طور پر تسلیم کیا گیا ہے۔ ایسے درخواست نامے جو ایجنٹس کی حلفیہ تصدیق کے بغیر ہوں، انہیں فہرست میں شامل نہیں کیا جاتا، البتہ رجسٹریشن افسران ان پر غور ضرور کرتے ہیں۔