بیدر، 25 /اگست (ایس او نیوز/ایجنسی):ریاستی وزیر برائے حج و میونسپل ایڈمنسٹریشن رحیم خان نے کہا ہے کہ حالیہ دنوں بیدر ضلع میں ریکارڈ بارش نے عوامی زندگی کو بری طرح متاثر کیا ہے۔ بارش اور سیلابی پانی کی وجہ سے درجنوں مکانات منہدم ہوگئے ہیں جبکہ کسانوں کی کھڑی فصلیں برباد ہو گئی ہیں۔

وزیر رحیم خان نے بیدر تعلقہ کے بارش سے متاثرہ مختلف دیہاتوں کا دورہ کیا اور متاثرہ مکانات، سڑکوں اور کھیتوں کا معائنہ کیا۔ اس موقع پر انہوں نے کہا کہ ضلع میں معمول سے تین گنا زیادہ بارش ریکارڈ کی گئی ہے جس کے نتیجے میں بڑے پیمانے پر نقصان ہوا ہے۔ انہوں نے یقین دہانی کرائی کہ متاثرہ خاندانوں کو فوری طور پر 7 تا 10 ہزار روپے کی ایمرجنسی امداد فراہم کی جا رہی ہے، جب کہ تفصیلی سروے کے بعد مکمل معاوضہ بھی دیا جائے گا۔

وزیر نے بتایا کہ مالیگاؤں سرکل اور جنواڈا سرکل کے مالیگاؤں، چلرگی، گڈگی، یارانلی اور سنگوی گاؤں سمیت کئی مقامات پر مکانات کو شدید نقصان پہنچا ہے۔ صرف چلرگی گاؤں میں 7، گڈگی میں 5 اور حمیلاپور میں 6 مکانات بری طرح متاثر ہوئے ہیں۔ اسی طرح کسانوں کی فصلیں خصوصاً نام اور اُدو بارش و سیلابی پانی سے تباہ ہوگئی ہیں۔

رحیم خان نے کہا کہ محکمہ زراعت اور باغبانی کو فصلوں کے نقصانات کا سروے کرنے کی ہدایت پہلے ہی دی جا چکی ہے۔ انہوں نے مزید بتایا کہ وہ وزیر اعلیٰ اور متعلقہ وزراء کو مکمل صورتحال سے آگاہ کر چکے ہیں اور متاثرین کی بازآبادکاری کے لیے 100 تا 200 کروڑ روپے کی خصوصی گرانٹ جاری کرنے کی درخواست کی ہے۔

اس موقع پر ضلع گارنٹی اسکیم کمیٹی کے صدر امرت راؤ چماکوڈ، بیدر اسسٹنٹ کمشنر محمد شکیل، محکمہ زراعت کی جوائنٹ ڈائریکٹر دیویکا، بیدر تحصیلدار رویندر دھاما، ای او مانیکاراؤ پاٹل اور محکمہ زراعت کے ڈپٹی ڈائریکٹر اقبال انصاری سمیت کئی اعلیٰ افسران بھی وزیر کے ہمراہ موجود تھے۔