احمد آباد، 16 /جون (ایس او نیوز /پی ٹی آئی)احمد آباد میں ایئر انڈیا کے طیارے کے ہولناک حادثے میں 270 جانوں کے نقصان کے چار روز بعد اب تک 87 متاثرین کی شناخت ڈی این اے میچنگ کے ذریعے کر لی گئی ہے جبکہ 47 لاشیں ان کے لواحقین کے حوالے کی جا چکی ہیں، حکام نے پیر کے روز بتایاکہ اس سے قبل اتوار کو اسپتال انتظامیہ نے تصدیق کی تھی کہ سابق گجرات کے وزیر اعلیٰ وجے روپانی کی میت بھی ڈی این اے ٹیسٹ کے ذریعے شناخت کر لی گئی ہے اور یہ میت پیر کے روز ان کے اہل خانہ کے حوالے کی جائے گی۔

روپانی ان 242 مسافروں اور عملے کے ارکان میں شامل تھے جو 12 جون کو احمد آباد میں گر کر تباہ ہونے والی لندن جانے والی ایئر انڈیا کی پرواز AI-171 میں سوار تھے۔حکام 12 جون کے طیارہ حادثے کے بعد لاشوں کی شناخت کے لیے ڈی این اے ٹیسٹ کروا رہے ہیں کیونکہ زیادہ تر لاشیں ناقابل شناخت حد تک جھلس چکی تھیں یا کسی اور طرح سے شدید متاثر ہو گئی تھیں۔

ایڈیشنل سول سپرنٹنڈنٹ ڈاکٹر رجنیش پٹیل نے صحافیوں کو بتایا، "اب تک 87 ڈی این اے سیمپلز میچ کر چکے ہیں، اور 47 لاشیں پہلے ہی متعلقہ خاندانوں کے حوالے کی جا چکی ہیں۔ یہ متوفی گجرات اور راجستھان کے مختلف حصوں سے تعلق رکھتے تھے جیسے کہ ادے پور، بھرچ، آنند، جوناگرھ، بھاونگر، وڈودرا، کھیڑا، مہسانہ، اروالی اور احمد آباد۔"

انہوں نے مزید کہا کہ نو متاثرین کے اہل خانہ میتوں کے حصول کے منتظر ہیں، جبکہ آٹھ دیگر متاثرین کے رشتہ دار، جن کی شناخت ڈی این اے میچنگ سے ہو چکی ہے، چند گھنٹوں میں پہنچ جائیں گے۔اس سے قبل اتوار کو احمد آباد سول اسپتال کی انتظامیہ نے ایک بیان میں کہا تھا کہ طیارے میں سوار افراد اور زمین پر جاں بحق ہونے والوں سمیت 250 متاثرین کے سیمپلز شناخت کے لیے جمع کیے جا چکے ہیں۔بوئنگ 787-8 ڈریملائنر، جس میں 242 افراد سوار تھے، 12 جون کو دوپہر 1 بج کر 39 منٹ پر سردار ولبھ بھائی پٹیل انٹرنیشنل ایئرپورٹ سے اڑان بھرنے کے کچھ ہی دیر بعد احمد آباد کے ایک میڈیکل کالج کمپلیکس سے جا ٹکرایا تھا۔طیارے میں سوار 241 افراد ہلاک ہو گئے، جبکہ ایک مسافر معجزاتی طور پر زندہ بچ گیا۔اس کے علاوہ زمین پر پیش آنے والے اس حادثے میں 29 افراد کی ہلاکت کی اطلاع ہے، جن میں پانچ ایم بی بی ایس طلباء بھی شامل ہیں۔