جونپور ، 21/فروری (ایس او نیوز/ایجنسی )اتر پردیش کے جونپور میں آج صبح ایک شدید سڑک حادثہ پیش آیا، جہاں مہاکمبھ جانے والی ایک ڈبل ڈیکر بس تیز رفتاری کے باعث ایک چاول سے لدے ٹرک سے ٹکرا گئی۔ یہ حادثہ تقریباً صبح 5 بجے پیش آیا، جس میں بس میں سوار عقیدت مندوں میں سے 6 افراد موقع پر ہی جان کی بازی ہار گئے، جبکہ 40 سے زائد افراد زخمی ہو گئے۔ زخمیوں میں کئی کی حالت نازک بتائی جا رہی ہے، جنہیں قریبی اسپتال میں داخل کرایا گیا ہے۔

یہ حادثہ جونپور کے بدلاپور تھانہ علاقے کے سروکھن پور میں پیش آیا۔ حادثے کے بعد موقع پر کہرام مچ گیا، زخمیوں کی چیخ و پکار سن کر آس پاس کے لوگ مدد کے لیے پہنچے۔ ٹکر اتنی شدید تھی کہ بس کا اگلا حصہ بری طرح تباہ ہو گیا۔

بتایا جا رہا ہے کہ یہ بس دہلی کے قرول باغ سے آ رہی تھی اور اس میں سوار عقیدت مند 15 فروری کو دہلی سے روانہ ہوئے تھے، جنہیں 21 فروری کو واپس جانا تھا۔ وہ سب مہاکمبھ میں مقدس اشنان کے لیے جا رہے تھے، لیکن راستے میں خوفناک حادثے کا شکار ہو گئے۔

بس میں سوار مسافروں نے بتایا کہ حادثے کے وقت وہ سو رہے تھے کہ اچانک ایک زوردار جھٹکا لگا اور وہ آگے کی طرف گر پڑے۔ بس میں تقریباً 54 مسافر سوار تھے جبکہ ڈرائیور کے ساتھ 3 سے 4 دیگر افراد بھی تھے۔ حادثے میں بس ڈرائیور کی بہن بھی جان کی بازی ہار گئی۔

حادثے کی اطلاع ملتے ہی ضلع مجسٹریٹ دنیش چند دیگر اعلیٰ پولیس افسران کے ساتھ اسپتال پہنچے اور زخمیوں سے ملاقات کی۔ ڈی ایم نے کہا کہ جیسے ہی اطلاع ملی، پولیس اور امدادی ٹیمیں موقع پر پہنچیں اور زخمیوں کو فوری طور پر اسپتال منتقل کیا گیا۔ تمام زخمیوں کا مکمل علاج کرایا جا رہا ہے اور ان کی حالت پر مسلسل نظر رکھی جا رہی ہے۔