نئی دہلی،24؍اپریل(ایس او نیوز؍آئی این ایس انڈیا) سپریم کورٹ نے جمنا ندی میں آلودگی کو لے کر 23 سال پرانی مفاد عامہ کی عرضی آج نیشنل گرین اتھارٹی کے یہاں منتقل کر دی۔چیف جسٹس جگدیش سنگھ کھیہر اور جسٹس دھننجے وائی چندرچوڈ کی بنچ نے کہا کہ ایک ہی مسئلے پر غور کے لئے دو متوازی دائرہ اختیار نہیں ہو سکتے ہیں۔بنچ نے اس مفاد عامہ کی عرضی کو گرین اتھارٹی کے یہاں منتقل کر دیا۔ کورٹ نے ایک انگریزی روزنامہ میں قومی دارالحکومت علاقہ میں جمنا میں آلودگی کی صورت حال کے بارے میں شائع خبر پر خود کار طریقے سے نوٹس لیتے ہوئے اسے مفاد عامہ کی عرضی میں تبدیل کر دیا تھا۔