پٹنہ:31/جولائی (ایس او نیوز/آئی این ایس انڈیا)ریلوے کی گروپ سی اور ڈی کے امتحانات کے لئے دور دراز کے علاقوں میں امتحانی مراکز کے قیام کے لیے بہار کے اپوزیشن لیڈر تیجسوی یادو نے مرکزی وزیر ریل پیوش گوئل کو خط لکھا ہے۔خط میں انہوں نے سوال اٹھایا ہے کہ آخر یہ کیسا آن لائن امتحان ہے جسے دینے کے لئے امتحان کے لیے 2000 کلومیٹر جانا پڑے؟ شاندار یادو نے کہا کہ 9 اگست سے شروع ہو رہے امتحانات میں بہار کے امیدواروں کو 1000-1500 کلومیٹر دور سینٹر دے دیا گیا ہے۔کسی امیدوار کو امتحان دینے موہالی جانا پڑے گا تو کسی کو بنگلور۔ زیادہ تر امیدوار متوسط خاندانوں سے تعلق رکھتے ہیں، ایسے میں ٹرین میں ریزرویشن کرا کر امتحان دینے جانا مشکل ہے۔صرف جنرل کوچ ہی متبادل بچتا ہے۔دوسری طرف سفر کے علاوہ دیگراخراجات میں بھی کافی پیسے خرچ ہوں گے ۔کئی مراکز تک براہ راست ٹرین بھی نہیں ہیں۔ایسے میں طلبا کو مزید دشواری کا سامنا کرناپڑے گا ۔ تیجسوی یادو نے کہا ہے کہ وزارت طالب علموں کو ان کے گھر کے قریب امتحانی مراکز مختص کرے اور امتحان کی نئی تاریخیں اعلان کرے۔ اگر ایسا نہیں ہوا تو طلباء تحریک پر مجبور ہوں گے۔واضح ہو کہ ریلوے میں گروپ سی (Group C) کے عہدوں پر تقرری امتحان 9 اگست کو منعقد ہوگاد۔ داخلہ امتحان دور دراز علاقوں میں منعقد کرنے کے الزام پر ریلوے نے صفائی دی ہے۔ریل کی وزارت نے کہا کہ 71 فیصد سے زیادہ امیدواروں کو ان کے شہروں سے 200 کلومیٹر کے دائرے میں امتحان مرکز مختص کئے گئے ہیں۔وزارت نے کہا کہ آر آر بی بھرتی امتحان کے لئے 47 لاکھ سے زیادہ امیدواروں نے درخواست دیئے ہیں۔ہم نے امیدواروں کی سہولت کو مدنظر رکھتے ہوئے امتحان سینٹر ا ن کے شہر یا ان کے شہر کے پاس مختص کئے ہیں۔ وزارت نے کہاکہ ہم نے جسمانی طور کمزور 99 فیصد مرد اور خاتون امیدواروں کا سینٹران کے شہر سے 200 کلومیٹر کے دائرے میں مختص کئے ہیں۔