نئی دہلی ، 11/ مئی (ایس او نیوز /ایجنسی)گزشتہ دنوں بڑھتی ہوئی کشیدگی کے درمیان جب دنیا کو ایک بڑی جنگ کا خدشہ لاحق تھا، ہفتے کے روز ہندوستان اور پاکستان نے اچانک جنگ بندی کا اعلان کیا۔ دونوں ملکوں نے باہمی رضامندی سے ایک دوسرے پر کسی بھی قسم کے حملے سے گریز کرنے پر اتفاق کیا۔ سنیچر کی شام 5 بجکر 25منٹ پر امریکی صدر ڈونالڈ ٹرمپ نے اس غیر متوقع جنگ بندی کا اعلان کرتے ہوئے دنیا کو حیران کر دیا، جس کی بعد میں دونوں ملکوں کے حکام نے باضابطہ تصدیق بھی کر دی۔

خارجہ سیکریٹری وکرم مصری نے سنیچرکی شام ایک خصوصی بریفنگ میں جنگ بندی کا اعلان کیا۔ انہوں نے کہا کہ پاکستان کے ملٹری آپریشنز کے ڈائریکٹر جنرل(ڈی جی ایم او) نے اپنے ہندوستانی ہم منصب سے 3 بجکر 35 منٹ پر ٹیلی فون پر بات چیت کا آغاز کیا۔ اس بات چیت میں دونوں نے شام ۵؍بجے سے ہر طرح کی فوجی کارروائی روکنے پر اتفاق کیا۔ اس حوالے سے دونوں ممالک نے اپنی مسلح افواج کو اس پر عمل درآمد کے احکامات جاری کئے ہیں۔ ‘‘

دونوں فوجی افسران(ڈی جی ایم او) پیر یعنی 12 مئی کو دوپہر 12 بجے صورتحال کا جائزہ لینے کیلئے دوبارہ گفتگو کریں گے۔ ہندوستان نے واضح کردیا ہے کہ یہ جنگ بندی اس کی شرائط کے مطابق ہی ہوئی ہے۔ اب اگر پاکستان کی جانب سے دہشت گردی کا کوئی بھی واقعہ ہوا تو اسے اعلان جنگ تصور کیا جائے گا اور پھر پاکستان کی اینٹ سے اینٹ بجا دی جائے گی۔ جنگ بندی اتنی حیرت انگیز نہیں ہے جتنی یہ بات حیرت انگیز ہے کہ امریکی صدر نے اس کا اعلان کیا۔

انہوں  نے اپنے سوشل میڈیا ہینڈل ٹروتھ پر پوسٹ کیا کہ ’’امریکہ کی ثالثی میں رات کوطویل بات چیت کے بعد مجھے یہ اعلان کرتے ہوئے بے حدخوشی ہو رہی ہے کہ ہندوستان اور پاکستان نے مکمل اور فوری جنگ بندی پر اتفاق کیا ہے۔ دونوں ممالک کو دانشمندی اور سوجھ بوجھ سے کام لینے پر مبارکباد۔ ‘‘ ا س کے کچھ ہی دیر بعد امریکی وزیر خارجہ نے بھی جنگ بندی کی اطلاع دی۔

جنگ بندی کے اعلان کے فوراً بعد وزیراعظم مودی کی قیادت میں  اعلیٰ سطحی میٹنگ منعقد ہوئی جس میں  فوج کے تینوں  شعبوں کےسربراہ، وزیر دفاع راج ناتھ سنگھ، قومی سلامتی کے مشیر (این ایس اے ) اجیت ڈوبھال، وزیرخارجہ جے شنکر اور چیف آف ڈیفنس اسٹاف انل چوہان موجود تھے۔ ہندوستان نے پاکستان کو سخت وارننگ دی ہے کہ اس کی جانب سے مستقبل میں  کشیدگی کے اضافہ کا باعث بننے والے کسی بھی اقدام کاپوری قوت کے ساتھ فیصلہ کن انداز میں  جواب دیا جائےگا۔

وزیر خارجہ ایس جے شنکر نے جنگ بندی پر کہا ہے کہ ہندوستان دہشت گردی سے کوئی سمجھوتہ نہیں کرے گا اور اس کے خلاف لڑائی جاری رہے گی۔ انہوں نےکہا کہ دہشت گردی کے خلاف کارروائی جاری رہے گی۔